Governu Timor-Leste

Primeiru Ministru, Dr. Rui Maria de Araújo, halo lansamentu ba  vistu Nova Vinheta ka Vistu Stiker foun ba Visto Chegada nian,  ne’ebé sei uza de’it ba vistu turista ho tránzitu.

Serimónia implementasaun vistu ne’e, hala’o direta ba pasajeiru turista sira ne’ebé tama mai Timor-Leste liuhusi Aeroportu Internasional Nicolau Lobato, Díli , loron tersa, 16 fulan-juñu  2015.

Tuir Ministru Interiór, Longuinhos Monteiro, sistema ne’e importante tebes, tanba nia bele halo rasik relatóriu diáriu, semanál, mensál no anuál.

Sistema ida-ne’e, ninia objetivu atu redúz  no minimiza falsifikasaun ba dokumentu sira. ,” Ita hotu hatene, hori uluk kedas to’o ohin loron ita sei taka vistu iha surat-tahan. Nune’e ema barak bele reprodús vistu sira,”  Longuinhos dehan.

Timor-Leste bele hatudu ona ba mundu, kapasidade no modernizasaun sistema tau viztu ba ema estranjeiru sira, tanba selu osan. Ba vistu sira seluk, hanesan vistu kortezia no seluk-seluk tan,  sei kontinua tau karimbu tanba vistu ofisiál sira.

Diretór-Jerál Servisu Migrasaun, José da Costa esplika, Governu lansa ona sistema ne’e iha fulan-fevereiru 2015. Maibé, la implementa tanba ekipamentu avaria. “ Ami hato’o problema ne’e liuhusi  Ministériu Interiór Governu Konstitusionál VI, mak foin bele hetan apoiu ekipamentu ne’e,” nia dehan tan.

Tuir loloos implementasaun vistu turístika ne’e halo mós iha postu integradu ka postu sira ne’ebé mak iha, maibé labele tanba ekipamentus seidauk sufisente, Diretór-Jerál hateten.

Marka prezensa iha lansamentu sistema ne'e,  Primeiru-Ministru, Rui Maria de Araújo, Ministru Interiór, Longuinho Monteiro, Diretór-Jerál Servisu Korportaivus, Guilhermina F. S. Ribeiro, Diretór-Jerál Servisu Migrasaun Superintendente Asisténsia Polisia, José da Costa no mós Inspetora-Jerál Ministério Interiór,  Cândida Soares.