Governu–Forum ONG Organiza Konferénsia nasionál ba Auditoria Sosiál
Gabinete Primeiru-Ministru Repúblika Demokrátika Timor-Leste servisu hamutuk ho Fórum ONG Timor-Leste (FONGTIL), hala’o konferénsia nasionál ida kona-ba Auditoria Sosiál ho tema “Liuhosi Auditoria Sosiál atu Garante Partisipasaun Públiku hodi hadi’a Prestasaun Servisu”.
Konferénsia ne’e hala’o iha loron 25 fulan-maiu 2015, iha Salaun Nobre, Ministériu Negósiu Estranjeiru no Kooperasaun, Praia dos Coqueiros, Dili.
Primeiru-Ministru, Dr. Rui Maria de Araújo iha diskursu hateten, auditoria sosiál mak instrumentu importante atu Estadu no Governu hamutuk dudu prosesu dezenvolvimente iha rai ne’e. “ Fó apoiu ba malu, la’os atu taka matan ba malu, la’os atu husik liu buat ne’ebé laloos. Apoiu ba malu ho sentidu atu aprezenta faktus ba malu, kona-ba governasaun se karik la konsege atinje objetivu sira, entaun sosiedade sivil no Governu bele ko’alia ba malu,” Primeiru Ministru esplika.
Aleinde ne’e, presiza iha garantia ba komprimisu ne’ebé Governu hala’o ba dezenvolvimentu, la’o di’ak no lori rezultadu di’ak ba povu tomak. “ Ideia sira-ne’e tenki tau iha prátika. Agora hanoin oinsá halo parseria auditoria sosiál entre Governu ho sosiadade sivil/ Ida-idak ho ninia responsabilidade,” Primeriu Ministru afirma.
Hanesan Xefe Governu, enkoraja sosiedade sivil atu partisipa maka’as liután iha prosesu dezenvolvimentu. La’os de’it atu sai parseiru ida ne’ebé halo barullu, maibé parseiru ne’ebé hatudu evidénsia kredível kona-ba hodi bele hadi’a implementasaun programa governu nian.
Iha parte seluk, Arsénio Pereira da Silva, Diretór Ezekutivu FONGTIL hateten, sosiedade sivil hanesan pilár importante iha nasaun idaidak, hanesan ajente kontrolu sosiál.
“Forum ONG Timor-Leste (FONGTIL) ho ninia membru tomak desde hahú to’o ohin-loron, sempre iha hanoin ida ne’ebé konstrutivu ba Estadu no Governu RDTL, liuhosi maneira oioin hodi kontribui ba dezenvolvimentu nasionál,” Arsénio dehan. “Ita hotu orgullu ba dezenvolvimentu nee’bé la’o di’ak. Maibé, balu ne’ebé seidauk la’o di’ak, ita kontribui atu hadi’a hamutuk hodi sai di’ak liután,” Diretór ne’e reafirma.
Partisipa iha konferénsia ne’e, reprezentante hosi organizasaun Sosiedade Sivil sira, Setór privadu Cámara Comércio IndustriaTimor-Leste (CCITL), akadémiku no líder komunitáriu sira.
