Misa Requiem ba Saudozu Fernando Lasama de Araújo
Bispu Dioseze Maliana, Dom Norberto Amaral prezide Misa Requiem ba mate isin Fernando Lasama de Araújo, Ministru Koordenadór Asuntu Sosiál no Ministru Edukasaun iha Governu Konstitusionál VI iha Igreja Katedrál Dili, sesta-feira, 5 fulan-juñu 2015. Misa ne’e partisipa mós hosi Saudozu nia kaben Jacqueline Siapno no oan mane Lirio Aquino Hadomi Araújo, asiste mós husi sarani sira rihun ba rihun.
Iha nia homilia, Bispo Noberto hateten, Na’i Maromak iha nia lia-fuan murak ba ita ema iha mundu. “Ha’u mak moris hi’as no moris. Ema se mak fiar Ha’u, nia sei la mate,” Amo Bispu Norberto haktuir Maromak nia lia-fuan.
Hanesan ema iha mundu sempre hasoru buat rua, moris no mate. “ Ita ema moris dalaruma lori ksolok ba ema no fó hamnasa ba ita, ita mate fó tristeza no matan been ba família. Ita labele sees ka subar husi buat rua ne’e. Ne’e realidade rua no mistériu rua,” Amu Bispu dehan.
“Hanesan ema, sempre moris ho kakutak limitadu, la hatene loloos saida sei mak akontese iha moris. Maromak mak sei mai rezolve mistériu ne’e rasik. “ Maromak mak moris hun. Nia hakarak ema moris iha mundu, moris ba bebeik, bainhira ema moris tuir buat ne’ebé mak Nia haruka,” Bispu Ainaru oan ne’e esplika. “Tanba ne’e, hanesan ema, tenki neon na’in hasoru moris no mate, la hatene bainhira mak Maromak to’o mai atu resolve”.
Ko’alia kona-na Fernando Lasama de Araújo nia luta, Amu Bispu dehan katak, durante ne’e Lasama hala’o ona nia moris to’o moris nia ninin. “Ohin loron halo ita relemba fali, saida mak nia halo durante moris desde ki’ik to’o mate. Lasama iha mehi boot, nune’e nia barani atu luta. Lasama hakarak loos atu hako’ak foho, maibé oinsá loos? Balu nia alkansa, balu la alkansa,” Amu hatete.
Durante nia moris, Lasama sai fundadór ba Partidu Demokrátiku (PD), kaer kargu Prezidente Parlamentu Nasionál períodu ida, Vise-Primeiru-Ministru períodu balu no ikus sai Ministru Edukasaun.
Povu Timor-Leste agradese ba Lasama nia luta. Nia mehi se sai imortál ba jerasaun foun sira, iha nasaun Timor-Leste.
Rai Ainaru lakon nia oan mane di’ak ida iha nasaun ne’e. “ Agradese ba Maromak, ba Lasama, kona-ba buat ne’ebé nia halo ona, inklui mós buat hirak ne’ebé nia halo ona ba jerasaun foun. Lasama nia mehi sira ne’ebé seida’uk realiza, jerasaun foun sira maka bele hatutan,” Amu tenik tan.
Amu Bispu mós husu ba ema hotu, atu perdua Lasama nia sala sira, ne’ebé halo durante nia moris. Reza ba nia klamar, atu hetan fatin di’ak iha Na’i Maromak nia sorin kuana.
Partisipa iha serimónia Prezidente Parlamentu Nasionál, Vicente Guterres, Prezidente Repúblika, Taur Matan Ruak ho nia espoza, Isabel Ferreira, Primeiru- Ministru, Rui Maria de Araújo ho espoza, órgaun soberanu seluk, membru Governu, membru Parlamentu Nasionál no konvidadu sira.
