Estadu Timor-Leste Kondekora Saudozu Lasama
Estadu Repúblika Demokrátika Timor-Leste fó kondekorasaun ba Saudozu Fernando Lasama de Araújo ho titulu póstumo Órden Nicolau Lobato iha Parlamentu Nasionál, loron sesta, 5 fulan-juñu 2015, tanba rekoñese nia partisipasaun ba luta libertasaun nasionál, durante nia moris.
Kondekorasaun ne’e bazeia ba Dekretu Lei Prezidente Repúblika, Nu. 46/2015, loron 3 fulan-juñu, ne’ebé lee sai husi Prezidente Komisaun Omenajen, Virgílio Smith. Konkodekorasuan ne’e, hala’o liuhusi plenária Parlamentu Nasionál ne’ebé dirije diretamante husi Prezidente Parlamentu Nasionál, Vicente Guterres, ne’ebé loke ho Inu Nasionál Pátria!Pátria!”. Hafoin ne’e, kontinua ho um minuto de silêncio.
Iha kondekorasuan ne’e, Prezidente Repúlika, Taur Matan Ruak tara uluk medalla kondekorasaun ba Lasama nia kaixaun, hakru’uk ba kaixaun iha momentu balu, hafoin ne’e, entrega medalla ba oan mane boot, Lírio Aquino Hadomi Araújo, asiste diretamente husi nia kaben Jacqueline Siapno.
Prezidente Repúblika, Taur Matan Ruak iha nia diskursu hateten, Fernando Lasama de Araújo, figura ida-ne’ebé fó nia aan tomak ba libertasaun nasionál dezde nia sei ki’ik.
Estadu Timor-Leste fó onra no valoriza saudozu Fernando Lasama de Araújo nia luta durante tinan 24 okupasaun Indonézia nian, to’o Timor-Leste ukun rasik aan.“Hafoin restaurasaun independénsia, 20 Maiu 2002, Fernando Lasama kontinua nia involvementu iha prosesu tomak ba rekonstrusaun nasaun no hatudu duni nia kompromisu ba povu no estadu nia di’ak iha futuru. Líder jerasaun foun ida-ne’e, sai matadalan ba jerasaun timoroan tomak, atu banati tuir”, Prezidente Taur hatutan.
Entertantu Prezidente Parlamentu Nasionál, Vicente Guterres, ho emosaun no matan-been nakonu dehan, “ Fernando Lasama nia mate, relembra fali nia moris desde ki’ik to luta iha loron ikus iha momentu nia hala’o hela servisu. Husu ba nia atu perdua ita-nia sala sira. Ita mós perdua nia sala sira, atu hetan fatin di’ak iha lalehan.”
Serimónia kondekorasaun ne’e, taka ho intervensaun bankada parlamentar, FRENTE MUDANSA, Partidu DEMOKRÁTIKU, FRETELIN no CNRT hodi fó omenajen no onra ikus liu, ba Saudozu Fernando La Sama de Araújo, Kombatente Libertasaun Nasionál, no Líder ida hosi jerasaun foun Nasaun nian.
