Primeiru-Ministru Inagura Eskola Maria Auxiliadora iha Komoro-Dili
Primeiru-Ministru Dr. Rui Maria de Araújo inagura iha sesta-feira (29/05) Eskola Maria Auxiliadora, Kongregasaun Saleziana nian, iha Komoro, Dili.
Primeiru-Ministru lori Governu nia naran hato’o parabéns ba Kongresaun Saleziana ne’ebé halo esforsu bo’ot tebtebes atu kria kondisaun atu nune’e foin sa’e no labarik Timor-oan sira bele dezenvolve sira nia an liuhosi edukasaun ne’ebé di’ak atu nune’e bele mós kontribui hanesan sidadaun di’ak.
“Governu rekoñese mós katak, Kongregasaun Saleziana liuhusi sira nia apostuladu sira iha área formasaun umana nian importante tebtebes ba formasaun ema Timoroan nian,” hatete Primeiru-Ministru.
Xefe Governu mós dehan ba estudante sira ne’ebé marka prezensa iha inaugurasaun ne’e kona-ba prinsípiu importante ba estudante sira maka ‘princípio de continuidade’. “Ita nia líder sira husi tinan hirak uluk hahú tiha prosesu balu ona. Ami sira ne’ebé hamrik iha oin ne’e kontinua ba oin e ami hein katak aban bain rua ita bo’ot sira mak sei tutan lori tan rai ida ne’e ba oin. Ne’e duni kontinuidade importante,” tenik Primeiru-Ministru.
Primeiru-Minsitru salienta mós iha okaziaun ne’e moto populár ida ba estudante sira “Quem Abre Uma Escola Fecha Uma Prisão” katak “Sé mak Loke Eskola Ida, Taka Prizaun Ida,” no husu ba estudante sira atu utiliza didi’ak sira nia Eskola foun ne’e atubele dezenvolve sira nia an.
Prosesu hodi fó tulun ba harii Eskola Maria Auxiliadora iha Komoro, Dili, hahú kedas husi tempu Eis Primeiru-Ministru Sr. Xanana Gusmão, liuhusi fundu Sosiedadi Sivil nian no tanba ne’e maka Primeiru-Ministru husu atu hato’o mós agradesimentu ba Eis Primeiru-Ministru.
Kona-ba kestaun ne’ebé dala ruma mosu tanbasá maka Governu tenki kontina investe iha Igreja ka kongregasaun relijioza sira? Primeiru-Ministru esplika katak hotu-hotu servisu ba Povo no atu promove Ema Timor atu sai ema ne’ebé iha kapasidadi intelektuál no morál, atubele lori rai Timor-Leste ba oin.
“Portantu, investimentu ne’ebé maka fó liuhusi kongregasaun relijioza sira no liuhusi Igreja Katólika ne’e mós investimentu ho retornu ekonómiku ho sosiál ne’ebé bo’ot,” haktuir Primeiru-Ministru. “Se ita haree didi’ak lídere sira ne’ebé hamrik iha ita-nia prosesu luta libertasaun nia oin; líder sira ne’e mai husi formasaun eskola katólika sira, mai husi Igreija Katólika nia servisu ho kosar ben.”
Primeiru-Ministru nia lia-menon ikus ba estudante sira mak atu utiliza fasilidade foun iha Eskola Maria Auxiliadora halo loloos, halo manutensaun ho didi’ak, atu fasilidade hirak ne’e bele dura tinan barak no prepara mós estudante sira hodi nune’e aban bainrua bele kontribui ba dezenvolvimentu Timor-Leste nian.
