Primeiru-Ministru Simu Vizita Kortezia hosi Vise-Ministru ba Departamentu Ligasaun Internasionál Komité Sentrál Partidu Komunista Xinés
Primeiru-Ministru Dr. Rui Maria de Araújo simu vizita kortezia husi Vise-Ministru ba Departamentu Ligasaun Internasionál Komité Sentrál Partidu Komunista Xinés, Sr. Chen Fengxiang, ohin (15/04) iha Palásiu Governu, Dili.
Objetivu husi vizita kortezia ba dahuluk ida ne’e, atu Sr. Chen Fengxiang bele kongratula tomada pose Governu Konstitusionál VI nianne’ebé lidera husi Dr. Rui Araújo no mós atu hametin liután relasaun-bilaterál koperasaun entre nasaun Xina ho Timor-Leste.
Reprezentante hosi Komité Sentrál Partidu Komunista Xina nian, iha biban ida ne’e reafirma mós kompomisu Governu Xina nian atu kontinua fó apoiu ba Timor-Leste no atu hametin relasaun di’ak entre nasaun rua ne’e iha longu-prazu. Nasaun Xina maka nasaun primeiru ne’ebé harii nia embaixada iha Timor-Leste hafoin ukun-rasik an.
Primeiru-Ministru informa ba delegasaun Xina nian katak, Governu da- VI forma liuhusi modelu Unidade Nasionál no ninia lema maka ‘Trabalho de Ekipa, Um Por Todos e Todos Por Um.’
Xefe Governu mós salienta katak,Timor-Leste tenki diversifika ekonomia tanba Estadu Timor mak investidór no empregadór bo’ot liu no tanba ne’e, Governu buka hela maneira oinsá atu esplora setór hirak seluk ho oportunidade ba dezenvolvimentu no ba investimentu hanesan setór agrikultura no setór turizmu nian. Primeiru-Ministru enkoraja investidór sira hosi nasaun Xina nian atu aposta iha oportunidade investimentu nian sira iha Timor-Leste.
Vise-Ministru ba Departamentu Ligasaun Internasionál Komité Sentrál Partidu Komunista Xinés nian hatan katak, área turizmu iha poténsia bo’ot atu investe no dezenvolve iha Timor ba turista Xina nian sira tanba tinan-tinan hamutuk ema Xinés millaun 100 partisipa iha turizmu internasionál. Vise-Ministru, maske foin vizita Timor-Leste ba dahuluk bele haree ona ho matan poténsia turizmu nian tanba bele apresia diretamente Timor nia rikusoin naturál no ninia furak. Área investimentu seluk ne’ebé refere foka liu ba-iha poténsia Timor-Leste nian nu’udar portu-pontu lojístiku ida ba Rota da Seda (Silk Road) ba área transporte karga marítima nian.
Primeiru-Ministru informa ba delegasaun hosi nasaun Xina nian katak, tuir Planu Dezenvolvimentu Estratéjiku Timor-Leste nian tinan 2011-2030 inklui ona planu atu harii portu rua, ida iha Tibar no ida seluk- tán iha parte Kosta Sul nian.
Primeiru-Ministru Dr. Rui Araújo no Vise-Ministru Sr. Chen Fengxiang iha enkontru ne’e mós ko’alia kona-ba Timor-Leste nia relasaun diplomátika ho nasaun viziñu Austrália no Indonézia. Primeiru-Ministru salienta katak, Timor-Leste nia relasaun ho nasaun-viziñu Austrália no Indonésia bazeia ba Boa-Viziñansa no Polítika ne’ebé La Interfere iha asuntu doméstiku nasaun seluk nian; no maske iha diferensa opiniaun entre Timor-Leste ho nasaun Austrália kona-ba Delimitasaun Fronteira Marítima, maibé nasaun-viziñu rua ne’e sei nafatin liuhosi diálogu buka atu rezolve diferensa hirak ne’e.
