Governu Timor-Leste

Primeiru-Ministru Dr. Rui Maria de Araújo partisipa iha seminónia komemorasaun ba Aniversáriu Loron Mundiál Kruz Vermelha no Kresente Vermellu nian ne’ebé selebra iha loron 08 fulan-maiu, ohin, iha sede foun Kruz Vermelha Timor-Leste nian (CVTL),  iha Bairro Formosa, Dili.

Komemorasaun ida ne’e, hetan partisipasaun husi Ministra Solidaridade Sosiál, Isabel Amaral Guterres, delegasaun Komité Internasionál Kruz Vermelha (International Committee of the Red Cross-ICRC), delegasaun Federasaun Internasionál Kruz Vermelha (International Federation of the Red Cross-IFRC), autoridade lokál, juventude no voluntáriu sira CVTL nian.

Primeiru-Ministru hato’o parabens ba Kruz Vermelha ne’ebé selebra loron importante ida ne’e no hahii ba servisu voluntáriu CVTL nian 2.000 resin no  mós husu atu buka tan dalan atu Timoroan sira bele envolve an iha servisu voluntáriu ida ne’e. Primeiru-Ministru mós husu atu voluntáriu 2.000 resin ne’ebé oras ne’e iha CVTL, atu ida-idak lori tan ema ida hodi hola parte iha servisu CVTL nian atu nune’e wainhira komemora aniversáriu Loron Mundiál Kruz Vermelha nian ba tinan 2016, CVTL iha ona voluntáriu hamutuk 4.000 resin.

Primeiru-Ministru rekoñese mós tulun ne’ebé Kruz Vermelha fó ba Timoroan sira iha tempu rezisténsia no mós ba Primeiru-Ministru rasik wainhira tuun husi ai-laran. Husi pontu-de-vista Estadu nian, Primeiru-Ministru hakarak lansa dezafiu katak Ita iha Timor-Leste labele servisu hodi haree de’it ba ita nia kabun maibé presiza mós fó liman hodi ajuda nasaun seluk.

Governu foin lalais ne’e fo ajuda ba Nepál hamutuk osan $500,000 hodi tulun vítima no sobrevivente sira husi dezastre rai-nakdoko ne’ebé afeta makaas povu nasaun Nepál nian. Primeiru-Ministru mós husu  atu CVTL prepara voluntáriu Timoroan sira hodi fó tulun wainhira akontese dezastre naturais ruma iha rai laran no mós iha rai li’ur; hanesan bele involve médiku Timoroan sira hodi Timor-Leste bele habelar ninia servisu umanitária aleindé fó tulun ho osan.

Dr. Rui Maria de Araújo husu atu atividade Kruz Vermelha nian tenke kontinua nafatin. Iha biban ida ne’e Primeiru-Ministru fó orientasaun ba Ministra Solidaridade Sosiál atu haree oinsá bele inklui subvensaun fiksu ba apoiu servisu Kruz Vermelha iha Timor-Leste. Primeiru-Ministru simbolikamente lansa atividadi hodi komemora aniversáriu Loron Mundiál Kruz Vermelha no Krexente Vermellu nian ho doasaun pesoál ba kaixa-box doasaun nian iha edifísiu CVTL foun ne’ebé harii ho fundu parsiál husi Fundus Sosiedadi Sivil Gabinete Primeiru-Ministru nian.