Governu Timor-Leste

Primeiru-Ministru Dr. Rui Maria de Araújo iha Segunda-Feira (11/05) halo vizita ba Gabinete Inspesaun Jerál Estadu nian hodi haree besik sira nia funsionamentu servisu.

Gabinete Inspesaun Jerál Estadu nian (IGE sigla iha lian portugés) nu’udar instituisaun suprema independente, ne’ebé kontrola no hala’o fiskalizasaun ba administrasaun públika iha Timor-Leste, iha kompeténsia atu halo auditoria, inspesaun no investigasaun relasiona ho uza no kontrola rekursu Estadu nian atu nune’e bele garante transparénsia no legalidade hosi operasaun Governu nian.

Primeiru-Ministru salienta katak sistema kontrolu internu IGE nian importante teb-tebes ba Instituisaun Estadu nian hodi bele asegura katak mákina estadu la’o ho di’ak.

“Ita nia Estadu nia sistema kontrolu ne’e seidauk iha kondisaun tanba ne’e maka ohin hau mai vizita Gabinete Inspesaun Jerál Estadu nian atu haree oinsá maka bele dezenvolve no hametin liután sistema kontrolu interna ne’e.”

Primeiru-Ministru hatete mós katak objetivu husi harii sistema nasionál kontrolu internu ne’e atu bele haree efikásia no efisiénsia servisu organizasaun nian, halo kontrolu ida rigorozu ba relatóriu sira no mós haree kona-ba regra no prosedimentu sira ne’ebé organizasaun sira tenki kumpri.

Iha vizita ne’e Inspetór Jerál Estadu nian Francisco de Carvalho halo mós aprezentasaun husi esbosu Dekretu-Lei kona-ba sistema nasionál kontrolu interna nian ne’ebé nia Gabinete elabora hela.

Primeiru-Ministru apresia ba Inspesaun Jerál Estadu nian ne’ebé maka dezenvolve hela sistema nasionál kontrolu interna ne’e no hato’o instrusaun atu Gabinete IGE nian bele servisu hamutuk di’ak liután ho Gabinete Primeiru-Ministru nian.