Lansamentu Relatóriu ONG JSMP iha Setór Justisa
Ministru Justisa, Ivo Valente halo lansamentu ba Relatóriu organizasaun naun-governamentál, Judicial System Monitoring Programme (JSMP), kona-ba observasaun Jerál Setór Justisa nian tinan 2014. Serimónia ne’e hala’o iha aniversáriu JSMP nian ba dala XIV, iha loron 30, fulan-abril, tinan 2015, iha Otél Timor.
Ministru Justisa, Ivo Valente hatete katak, JSMP hanesan organizasaun naun-governamentál ida ne’ebé hatudu ona sira nia esforsu hodi kontribui ba-iha dezenvolvimentu setór justisa no JSMP nia papél tempu agora nian importante tébes hodi kontribui ba-iha prosesu dezenvolvimentu justisa no demokratizasaun iha ita-nia rai.
“JSMP sempre fó sai rezultadu monitorizasaun ne’ebé sira hala’o, ami avalia beibeik tinan-tinan, hanesan pessoál instituisaun Governu nian haree katak, JSMP nia rekomendasaun maioria razuavél no iha fundamentu tebes, presiza kolaborasaun no apoiu ita hotu-hotu nian hodi aprezenta rekomendasaun sirane’e.”
Nia reforsa tan, ema barak hanoin katak Governu tenki rezolve buat hotu-hotu, maibé “agora ita tenki muda hanoin sira ne’e. Governu nia papél atu hadi’a sistema justisa, maibé keta halakon ema-hotu nia partisipasaun hodi hadi’a ita-nia sistema judisiáriu. Ita hotu iha responsabilidade, tanba dezenvolvimentu justisa la’ós depende de’it ba instituisaun Estadu, maibé kapasidade individuál mós determina kualidade justisa ba ita-nia povu, importante mak autór judisiáriu sira kompriende didi’ak ida-idak nia papél, hatene di’ak profisionalizmu no aproximasaun metodolojia ne’ebé razuavél hodi fó rezolusaun ba área justisa nian.
Iha fatin hanesan, Diretór Ezekutivu JSMP, Luis Oliveira Sampaio hatutan, Parlamentu Nasionál sira presiza hadi’a di’ak liután mekanizmu fiskalizasaun iha baze, nune’e bele tulun Governu proteje planu ne’ebé reflete ba povu nian moris di’ak. Parlamentu Nasionál no Governu presiza konsidera, analiza no foti desizaun polítiku tuir Konstituisaun no baze legál sira, nune’e la hamosu konflitu ho Lei.
Alende relatóriu hato’o mós rekomendasaun ba servisu Parlamentu Nasionál, JSMP mós rekomenda atu Deputadu sira tenke kontinua halo fiskalizasaun no bankada opozisaun kontinua atu kaer metin ninia prinsípiu, kontrola no fiskaliza poder ezekutivu ho kualidade.
