Governu Timor-Leste

Iha loron 14 no loron 15 fulan-maiu tinan 2015, xefe Departementu Programa no Apoui Tékniku Diresaun Nasionál Servisu sira Bee nian, husi Ministériu Obras Públikas, Transportes no Komunikasaun nian, Martinus Nahak, partisipa iha konferénsia internasionál “WASH and ITC”, iha Washington DC, Iha Estadus Unidus Amérika.

Akompaña husi nia omólogu australianu husi programa asisténsia “Bee no Saneamentu iha Komunidade“ (BESIK), sorumutuk ne’e hanesan sorumutuk dahuluk husi jéneru ne’e nian iha área Teknolojia Informasaun no Komunikasaunnian (iha lian inglés,ICT) ne’ebé aplika ba iha setór Bee, Saneamentu no Ijiene (iha lian inglés,WASH).

Durante konferénsia ne’e, Martinus Nahak aprezenta Sistema Bee no Saneamentu ba delegadu sira seluk, ne’ebé elojia kompromisu Governu Timor-Leste nian atu fornese sistema informasaun nian ida ne’ebé abrajente no sustentável.

Sistema Bee no Saneamentu (SIBS) hanesan sistema integradu ida ne’ebé mak uza dadus husi fonte oioin hodi analiza kualidade no asesu komunidade ba servisu hirak ne’ebé mak fó ona, nune’e mós ho planeamentu, orsamentasaun no ezekusaun. Sistema ida ne’e pertense tomak ba Governu Timor nian no hetan apoui hosi programa asisténsia nian husi Austrália hanaran BESIK.

Konferénsia “WASH AND ICT” serve atu lansa inisiativa internasionál ida, hodi Troka Dadus kona-ba Pontu bee nian sira (WPDx - Water Point Data Exchange), ho hanoin atu normaliza no tau tuir mapa dadus kona-ba pontu bee nian sira. Baze husi WPDx hanesan apoia husi dadus SIBS nian, iha Timor-Leste, ne’ebé internasionalmente, disponível liuhusi sistema ida ne’e.

Aleinde integra Timor-Leste hanesan parseiru iha nível mundiál nian, iha konferénsia “WASH and ICT” halo mós investigasaun kona-ba teknolojia foun sira no estabelese kontaktu foun sira, ho hanoin atu investiga teknolojia ne’ebé mak adekuadu liu, atu ita-nia nasaun bele kontinua servisu ne’ebé mak la’o daudaun iha kondisaun ne’ebé mak di’ak liu.

Konferénsia ne’e konta mós ho prezensa husi organizasaun boot sira husi setór Bee no Saneamentu nian, finansiadór sira no mós funsionáriu oin-oin governu nian no mós espesialista sira husi área teknolojia nian.