Governu Timor-Leste

Sekretáriu Estadu Komunikasaun Sosiál, Nelio Isaac Sarmento, distribui Fundu Tarnsferénsia Públika (FTP) ba Rádiu Komunidade 14 iha territóriu tomak, iha loron 22 Maiu. Serimónia distribuisaun fundu sira iha Salaun Prezidénsia Konsellu Ministru, Palásiu Governu Dili, liuhusi asina Memorandu Entendimentu entre Sekretáriu Estadu ho Jestór Rádiu sira ne’e, ho objetivu apoia órgaun komunikasaun sosiál sira.

Akompaña iha serimónia ne’e Sekretáriu Estadu, Diretór Diresaun Nasionál Disiminasaun Informasaun (DNDI), Orlando da Conceição, no Diretór Sentru Rádiu Komunidade (SRK), Luis Evaristo dos Santos Soares. Sekretáriu Estadu Komunikasaun Sosiál, Nelio Isaac Sarmento hateten, apoiu ne’e hanesan segunda faze nian.  Faze primeiru halo iha tinan 2014.

“Husu ba Instituisaun Rádiu Komunidade, hanesan benefisiáriu atu uza didi’ak orsamentu ne’e ba atu nesesidade sira Rádiu Komunidade nian,” nia dehan. Transferénsia orsamentu sei halo dalarua, primeiru 40 % no segundu 60 %.

Atu fasilita di’ak liután ezekuasaun orsamentu Fundu Transferénsia Públika, Nelio Isaac husu ba Jestór Rádiu Komunidade sira atu hato’o nafatin relatóriu ezekusaun ba SEKOMS kada períudu ezekusaun nian.

Rádiu Komunidade sira ne’ebé simu fundu hirak ne’e, kompostu husi Rádiu Komunidade Tatamailau (Ainaru), Rádiu Komunidade Rai Husar (Aileu), Rádiu Komunidade Matebian no Rádiu Komunidade Bokoli (Baukau), Rádiu Komunidade Maliana, Rádiu Komunidade Ermera, Rádiu Komunidade Kova Taroman (Covalima), Rádiu Komunidade Tokodede (Liquisá), Rádiu Komunidade Vox Populi (Lospalos), Rádiu Komunidade Iliwai (Manatutu), Rádiu Komunidade Mauloko (Maubise), Rádiu Komunidade Atoni Lifau (Oekusi), Rádiu Komunidade Manufahi (Same), Rádiu Komunidade Povu Vikeke (Vikeke).