SEKOMS Asina Memorandu Entendimentu ba Fundu Tranferénsia Públika ho na’in ba Média
Sekretáriu Estadu Komunikasaun Sosiál, akompaña husi Diretór Diresaun Nasionál Disiminasaun Informasaun (DNDI) no Diretór Sentru Rádiu Komunidade (SRK), asina Memorandu Entedimentu ho na’in ba média sira kona-ba Fundu Transferénsia Públika ba tinan 2015 nian, iha Salaun Auditóriu Prezidénsia Konsellu Ministrus, Palásiu Governu, iha Sesta-feira, loron 8 fulan-maiu, tinan 2015, objetivu hosi apoiu ida ne’e, atu fó aten-barani ba órgaun komunikasaun sosiál atu sai forte liután.
Sekretáriu Estadu Komunikasaun Sosiál, Nélio Isaac Sarmento hatete katak, apoiu ida ne’e hanesan tulun ba faze daruak ne’ebé mak agora simu tiha ona iha faze dahuluk tinan 2014 nian, “husu ba Instituisaun média sira ne’ebé sai benefisiáriu ba fundu ida ne’e, atu fortifika liután ita boot sira nia instituisaun, hanesan bainbain ha’u hatete ona katak, uza oportunidade ida ne’e bá, tanba oportunidade sei lamai dala rua, Ita hein katak iha tinan rua ka tolu tuir mai, ita boot sira la presiza ona atu hetan tulun, tanba ita boot sira iha kbiit rasik ona atu la’o ba oin”.
Nune’e mós husu ba órgaun komunikasaun sosiál sira, liu-liu ba instituisaun média sira ne’e fó atensaun mós ba itaboot sira nia asset importante liu mak jornalista sira, bainhira kuandu hetan ona tulun sira hanesan ne’e tau mós atensaun ba imi nia rekursu umanu sira, atu nune’e, sira mós bele hetan benefísiu ruma hosi kompañia sira ne’ebé mak sira servisu ba, tenik SEKOMS, Nélio Isaac Sarmento.
Iha asina akordu ne’e, Sekretária Estadu Komunikasaun Sosiál hamutuk ho Diretór Instituisaun média sira hala’o mós despedida ba formandu na’in hitu, ne’ebé atu ba tuir formasaun iha Lembaga Pelatihan Dr. Soetomo, Jakarta (LPDS), benefisiáriu sira ne’e kompostu husi instituisaun Jornál Business Timor, Timor Post, Jornál Nasionál Diáriu, Jornál Independente, Suara Timor Lorosae, FOKUS no Jornál Matadalan.
