Governu Timor-Leste

TIMOR GAP, E.P. entrega formalmente ba Governu, iha sorumutuk Konsellu Ministrus loron 26 fulan-maiu Relatóriu Anuál tinan 2014 nian no auditoria ne’ebé hala’o husi empreza independente Deloitte, tuir lei no norma internasionál sira ba elaborasaun relatóriu finanseiru nian sira.

Iha aprezentasaun Relatóriu Konsellu Ministrus nian, hala’o iha loron ne’ebé mak Governu Konstitusionál VI nian kompleta loron 100 iha ninia governasaun, Prezidente TIMOR GAP,E.P., Francisco Monteiro, hato’o ho forma detallada atividade prinsipál sira ne’ebé hala’o iha tinan 2014 nia laran, liuliu kona-ba peskiza Tasi Timor no revizaun husi rekursu Greater Sunrise nian (upstream);dezenvolvimentu emprezariál no jestaun projetu sira nian (inklui área downstream); jestaun kona-ba projetu oin-oin Tasi Mane nian; dezenvolvimentu korporativu no profisionál, ne’ebé maka destaka liuliu ba informasaun rekursu umanu; no projetu esplorasaun Greater Sunrise nian.