Governu Timor-Leste

Governu hala’o sorumutu iha loron 14, fulan maiu, iha Ministériu Negósius Estranjeirus no Kooperasaun hodi ko’alia kona-ba “Jornada Orsamentál” ka reflete kona-ba uza orsamentu nian”, ne’ebé uluk hanaran “Yellow Road Workshop”.

Tuir iha semináriu ida ne’e, ne’ebé tinan-tinan Ministériu Finansas hala’o, maka Primeiru-Ministru, Dr. Rui Maria de Araújo, no membru governu sira seluk, hamutuk ho diretór-Jerál sira, diretór servisu finansas no ba funsionáriu sira iha área planeamentu no finansas, hodi bele defini Prioridade Nasionál nian sira ba tinan 2016, ho forma ida koordenadu no adekuadu ba planeamentu no implementasaun ba programa sira dezenvolvimentu nian, hanesan Planu Estratéjiku ba Dezenvolvimentu 2011 – 2030, nune’e mós atu hetan dalan hodi defini pakote fiskál.

Primeiru-Ministru iha ninia lia maklokek, nia husu ba sira atu bele konsentra-an ba iha aspetu hirak importante no lalika haree ba gastu no ko’alia buat barak-barak, atu nune’e bele to’o ba-iha objektivu hirak ne’ebé propoin ona iha definisaun kona-ba objektivu prinsipál sira ba preparasaun Orsamentu Estadu nian, ba tinan oin mai.

Gabinete Primeiru-Ministru no Ministériu Finansas hato’o aprezentasaun kona-ba planeamentu no planu anuál sira, análize no rezultadu ekonómiku sira, inflasaun, empregu, sustentabilidade fiskál no impostu sira.

Iha lorokraik, ko’alia kona-ba Envolope Fiskál ba Orsamentu Jerál Estadu nian iha tinan 2016, ne’ebé maka inklui iha laran asuntu hirak hanesan jestaun Fundu Minarai nian (reseita no despeza sira) preparasaun Orsamentu Jerál Estadu nian, hadi’a orsamentu no analiza sustentabilidade fiskál no iha ikus maka hato’o proposta hirak relevante atu hetan ninia objektivu.

Edukasaun, saúde, agrikultura (irrigasaun) no infra-estrutura bázika sira (manutensaun estrada, edifísiu públiku, bee no saneamentu) maka sai hanesan prioridade sira ba tinan 2016.

Ikusliu, Primeiru-Ministru ko’alia katak “Jornada Orsamentál sira” reflete dinámika ne’ebé Governu da-VI hakarak implementa, bazeia ba servisu iha ekipa.