SEAPSEM organiza formasaun ba feto emprezária Timoroan
Sekretária Estadu ba Apoiu no Promosaun Sósiu-Ekonómiku Feto, liuhusi Departementu Ekonómiku iha loron, 27 fulan-abril to’o loron 1 fulan-maiu 2015, fó formasaun ba feto Emprezária no Grupu Feto sira husi Munisípiu Likisá, Ermera, Aileu, Grupu feto Bikelianan Ataúru no Grupu Feto Natarbora iha salaun Maria Gorete Kaikoli, Dili.
Objetivu husi kapasitasaun ne’e atu aumenta koñesimentu ba feto sira kona-ba kontabilidade no oinsá sai jerente di’ak iha idak-idak nia grupu no kompañia.
Sekretária Estadu ba Apoiu no Promosaun Sósiu-Ekonomiku Feto, Veneranda Lemos Martins hateten, formasaun ne’e liuliu ba área dezenvolvimentu negósiu, komersializasaun, produsaun no jestaun osan iha grupu ka kompañia ho di’ak.
“ Feto sira tenki iha kapasidade atu sai jerente ba an rasik, ba ema seluk no bele kompete ho mane sira hodi kontribui ba dezenvolvimentu iha Timor-Leste,” Veneranda dehan.
Nia husu partisipante sira atu tuir formasaun ho sériu ho dixiplina, atu koñesimentu ne’ebé hetan husi formadór sira, bele aplika iha imi nia grupu idak-idak ka kompañia.
Elisa Jong Neu, Diretora ba kompañia Profrawaijaya, Lda, (Munisípiu Likisá) senti kontenti ho formasaun ne’e, tanba aumenta koñesimentu no promote sei implementa didi’ak.
Liafuan hanesan, hato’o husi Maria Imaculada da Silva, Diretora kompañia Badaen Solution Group,Lda (Natarbora, Munisípiu Manatutu) no Marciana Gomes husi Grupu feto Bikelianan.
“Ami presiza kontinuasau atu bele aprende buat barak tan, tanba treinamentu loron tolu de’it ne’e la to’o,” nia dehan tan.
Formasaun ne’e, hetan apoiu husi Formadór ne’ebé maihusi Institutu Apoiu Dezenvolvimentu Emprezariál (IADE), Agénsia Espesializada Investimentu (AEI), Banku Nasionál Komérsiu Timor-Leste (BNCTL), Servisu Rejistu no Verifikasaun Emprezariál (SERVE).
