Timor-Leste No PNUD Asina Akordu Diagnostiku Nasionál no Fortalesimentu Institusional Nivel Lokal
Governu Timor-Leste, liuhusi Sekretária Estadu Fortalesimentu Institusional (SEFI) no Programa Nasoins-Unidas ba Dezenvolvimentu (PNUD), iha loron 16 Abril 2015 asina akordu hodi apoia programa Diagnostiku Nasionál no Fortalesimentu Institusional Nivel Lokal.
PNUD fo apoiu tekniku husi peritus fortalesimentu institusional nian no peritus Diagnostiku Nasional hodi dezenha estratejia no konteudus ba fortalesimentu no mos apoiu hodi dezenha metodoljia no instrumentus hodi implementa programa Diagnostiko Nasional. Orsamentu ba koperasaun ne’e ho total US$.500,000 mai husi orsamentu Jeral Estadu tinan 2015.
Kuntiudu husi kustu ne’e uza hodi hala’o ativadade programadu sira, ne’ebé refleta iha Dokumentu Programa Kooperasaun “Sub-National Governance and Development Programme, 2014-2018” entre SEFI ho PNUD, asina iha Juñu 2014. Ho programa ne’e, bele garante katak bainhira implementa munisipiu iha tinan 2018, pesoal sira sei jere no presta servisu ho maneira akuntavel, transparente no efisiénte.
Ministru Ministériu Estadu, Koordenadór Asuntu Administrasaun Estado no Justisa/ Ministru Administrasaun Estatal, Dionisio Babo hateten, akordu entre Governu Timor-leste no PNUD, nudar programa kuntinuasaun husi politika V Governu, ne’ebé antes ne’e realiza tiha ona entre SEFI ho PNUD iha 2014, kona-ba harii kapasidade iha programa pre deskonsentrasaun. Atu hamosu kapasidade administrativus no jestaun ne’ebé aliña ho sistema governu efisiente, responsavel no efikaz ba boa-Governasaun husi nivel nasionál to lokál, Ministru hatutan, presiza estabelese prosidementu baziku ne’ebé nesesita no koresponde duni ba situasaun atual, ho liafuan hanesan planu ida, vizaun ida ho asaun ida.
“PNUD agradese Governu Timor-Leste ba kunfiansa ne’e hodi kopera iha áreas ne’e no mos iha áreas seluk ba dezenvolvimentupaís ne’e nian," Knut Ostby, Koordenadór Rezidente Nasoins-Unidas no Reprezentante Residente PNUD iha Timor-leste dehan.
PNUD sei kontinua atu hala’o ninia rede-servisu polítika global no rejionál durante moris tomak, husi programa ne’e, atu fornese koñesimentu no lisaun sira ne’ebé sei prova valór sira ba implementasaun efikás husi reforma desentralizasaun nasaun ne’e ninian.
Planu Dezenvolvimentu Estratéjiku Timor-Leste ba tinan 2011-2030, aliña ho provizaun konstitusionál ba desentralizasaun, liu-husi fortalesimentu Instituisaun Estadu sira, kria oportunidade ba partisipasaun demokrátiku lokál. Kompromisu ida-ne’e, refleta tiha ona iha programa dezentralizasaun tinan 5 tuir mai, liuhusi estabelesimentu pelu-menus múnisípiu 3 - 5 tinan 2017 nia rohan.
Partisipa mos iha serimónia ne’e, Francisco Soares Burlaku, Diretora Interina UNDP no reprezentante Governu no reprezentante seniór husi instituisaun Estadu sira, inklui Parseiru ba Dezenvolvimentu no funsionáriu PNUD no organizasaun Nasoins-Unidas sira-seluk.
