Governu Timor-Leste

Sekretáriu Estadu Terras no Propriedades, Jaime Xavier Lopes, hamutuk ho Prezidente Konsórsiu Sistema Nasionál Kadastru (SNK), Jorge Serrano, lansa levantamentu SNK iha Munisipiu Baukau, 13 Abril 2015.

Objetivu SNK nia papel atu halo  levantamentu kadastrál sistemátiku iha teritóriu Timor-Leste.

Sekretáriu Estadu Terras no Propriedade, Jaime Xaveir Lopes, iha nia diskursu hateten, levantamentu dadus ne’e hala’o ba daruak ona. Levantamentu primeiru hala’o iha IV Governu Konstitusionál.

“Lansamentu dala ida-ne’e importante, tanba moderniza liu nia sistema foti dadus, kompara ho levantamentu dahuluk, sukat rai uza de’it metru. Nasuan barak iha mundu seidauk uza ekipamentu modernu. Husu ba komunidade sira labele hadau malu rai. Tenki hatudu  kolaborasaun di’ak ho ekipa tékniku iha imi-nia hela fatin,” nia reafirma.

Nia mós informa, Governu RDTL iha determinasaun klaru atu responde dezafiu. Nune’e, importante atu regulariza titularidade propriedade, liuhosi implementasaun regras  transparenti no justu.

Adjunto Administradór Munisipiu Baucau, Francisco Xavier da Silva Guterres informa,  problema rai sei akontese tanba komunidade barak seidauk hatene kona-ba regularizasaun ba rai.

Francisco Guterres husu ba Xefe suku sira tenki rona didi’ak saida saida mak SETP hato’o kona-ba Terras no Propriedade. Nunee bele sai baze atu rezolve problema rai iha Munisípiu Baucau.