“Advogadu sira elementu importante ba desenvolvimentu sistema judisiáriu iha Timor-Leste”
Ministru Justisa, Ivo Valente, iha loron Segunda-feira, 20 Abril 2015, entrega sertifikadu ba graduadu Profisaun Advogadu Privada ba faze datoluk nian hamutuk ema na’in 32 iha Salaun Sentru Formasaun Jurídiku, Dili.
“Advogadu sira kontribui nu’udar elementu importante ba dezenvolvimentu sistema judisiáriu iha Timor-Leste no fiar katak sei harii justisa no halo sistema justisa nia kualidade di’ak liutan”, hateten Ivo Valente iha nia diskursu.
Graduadu sira ne’e kompleta formasaun durante fulan 24, faze teoria durante fulan 15 no faze estájiu no prátika durante fulan 9. Formasaun ne’e fasilita hosi Sentru Formasaun Jurídika, tuir termu artigu 11, Lei Nú 11/2008, loron 30 fulan-jullu kona-ba estabelesimentu regra hirak exersísiu advokasia privada nian iha Timor-Leste no institui formasaun profisionál advogadu sira nian.
Formasaun ne’e mós atu implementa kultura jurídika no judisiária, hodi fó resposta ba dezafiu sira ne’ebé eziste, atu nune’e, bele hadi’a liutan kompeténsia atór judisiáriu sira iha sistema justisa Timor-Leste nian.
“Formasaun hanesan sei kontinua ba advogadu privadu sira nune’e bele fó ona biban ne’ebé mak nesesáriu atu harii Ordem Advogadu Timor-Leste”, Ivo Valente esplika.
Partisipa iha serimónia ne’e, Defensór Públiku Jerál, Sergio Hornai, PDHJ, Komisaun Anti Korrupsaun, Reitór UNTL, Asosiasaun Advogadu Timor-Leste, Ájensia Internasionál sira, hanesan UNDP, The Asia Foundation, USAID, sosiedade sivíl, Diretór nasionais sira iha ámbitu Ministériu Justisa no família graduadu sira.
