Primeiru Ministru Sei Esforsu Tomak Hodi Rezolve Kestaun Veteranus Sira Nian
Primeiru-Ministru, Dr. Rui Araùjo, durante enkontru ida ne’ebe halao ho Veteranus sira hosi Munisipiu Lautem nian (06/03) hateten katak durante tinan rua mai VI Governu Konstitusional sei halo esforsu tomak hodi resolve kestaun Veteranus sira nian. Primeiru-Ministru haktuir tan ba veteranu sira ne’ebe marka prezensa iha enkontru ne’e katak Governu sei halo esforsu mos atu hamosu Konsellu Nasionál Veteranus.
Governu sei fó atensaun liu ba iha preokupasaun sira hanesan Prezidente Konsellu Jerál Veteranus Munisipiu Lautem, Renan Sela, hato’o kona-ba kestaun saúde Veteranus sira nian iha Timor-Leste tomak.
“Ministra saúde iha ona responsabilidade ida adisional atu organiza servisu nasionál saúde atu fó apoiu ba veteranus sira, hirak ne’ebé konfirmadu no rejistadu ona atu halo check up jerál ba sira hotu para hatene sira nia kondisaun saúde atual, no karik veteranus sira presiza asistensia ruma oinsa,” hatan Primeiru Ministru Araùjo.
Veteranus sira apela ba Primeiru Ministru Araùjo atu bele harii ekipa ida atu la’o ba distritu atu bele inteira ba situasaun real veteranus sira nian kona-ba sira nia saúde rasik.
