“Administradór No Xefe Suku Tenki Besik Povu”
Ministru Estadu Koordenadór Asuntu Administrasaun Estadu nian no Justisa no Ministru Administrasaun Estatál, Dionísio Babo Soares, husu ba administradór Munísipiu, Postu Administrativu no Xefe Suku sira iha Munísipiu Baucau, atu hakbesik aan ba povu loroloron hodi disemina informasaun loloos kona-ba situasaun moris no seguransa.
Iha enkontru ho Xefe Suku 59 iha Administrsaun Munisípiu Baucau, loron 08 fulan Abril 2015, Ministru Dionísio esplika kle’an liutan kona-na ba pápel lideransa komunitáriu. Aleinde ne’e, Ministru mós rona direta prekupasaun kona-ba situasaun ho dezafiu sira husi kada postu administrativu.
“Tenke hasoru malu ho povu iha baze hodi hatutan informasaun, liuhusi akompaña situasaun iha rai laran, hodi hato’o ba naiulun sira. Nune’e, bele buka forma saida maka bele aplika atu rezolve dezafiu sira, hanesan seguransa, no povu sira-nia movimentu iha área operasaun, atu labele sai vítima husi operasaun ne’e rasik,” Ministru dehan.
Aleinde ne’e, lider komunitáriu sira tenki kria diálogu ho komunidade sira, hodi hametin dame no unidade nasionál. Aleinde ne’e, prezensa Polísia komunitária iha komunidade tenki forte. Tanba grupu balun iha suku, buka atu halakon Estadu nia estruktura formal.
“ Lideransa komunitáriu tenki habelar informasaun loos ba povu, atu labele monu ba manobra no lia bosok husi grupu deskoñesidu. Tanba komunidade barak iha área remotas, ladún asesu informasaun di’ak husi nasionál,” nia dehan.
Partisipa iha enkontru ne’e, Komandante PNTL Munisípiu Baucau, Administradór Munisípiu Baucau, Administradór Postu Administrativu, Xefe Departmentu no funsionáriu públika munisípiu Baucau, inklui lider komunitariu 59.
