Primeiru-Ministru Husu Autoridade Lokál Organiza Limpeza Jerál
Iha loron 10 Abril, sesta-feira, Primeiru-Ministru Timor-Leste Dr. Rui Maria de Araújo husu ba Autoridade local sira, atu organiza populasaun sira halo limpeza jerál. Tanba, funsiunariu Publiku sei la halo tan servisu ne’e iha futuru.
Primeiru-Ministru husu ida-ne’e, bainhira halo enkontru ho Autoridade lokal sira husi postu administrativu Dom Aleixo, Munisipiu Dili, foin dadaun, relasiona ho atividade limpea jerál ne’ebé durante ne’e funsiunariu públiku sira mak halo, lidera husi Ministériu Administrasaun Estatal (MAE). Atividade ne’e nia objetivu atu hanorin komunidade sira, badinas hamoos fo’er sira hodi moris iha ambiente saudavel.
Iha enkontru ne’ebé akompaña husi Vie Ministru Administrasaun Estatal, Tomás do Rosário Cabral, Primeiru-Ministru dehan, sidade Dili, hanesan mós kapitál Timor-Leste tenke moos.
“Ita-nia problema la’os osan laiha, ema laiha ba servisu no laiha vontade polítika atu servisu, maibé problema mak oinsá organiza loloos servisu ne’e,” nia dehan.
“Entrega limpeza jerál ba autoridade lokál sira, atu mobilize povu halo limpeza. Administradór Munisipiu, Postu Administrativu no Xefe Suku sira iha responsabilidade organiza limpeza iha ema ida-idak nia moris fatin,” Rui Maria Araújo dehan tan.
Ministeriu Administrasaun Estatal no Ministeriu Obras Públika, Transporte no Komunikasaun presiza ativu halo koordenasaun servisu ho autoridade lokal. Vise-Ministru Administrasaun Estatál, Tomás do Rosário Cabral, husu ba Xefe Suku sira atu indentifika loja bo’ot sira atu halo limpeza, labele hein de’it estadu.
