BNCTL Asina Memorandu Entendimentu ho ANZ
Ministru Estadu Koordenador Asuntu Ekonómiku, Estanislau da Silva ho Diretor Banku ANZ Pasifiku ho Fiji, Vishnu Mohan, asiste diretamemnte serimona asina Memorandu Entendimentu (MoU) Banku Nasionál Kormésiu Timor - Leste (BNCTL) ho Banku ANZ, Tersa-feira, 31 Marsu 2015.
Objetivu memorandu ne’e, atu Banku rua implementa modelu Mobile Phone Banking Solutions iha Timor-Leste. Iha serimonia ne’e, David Dennis reprezenta Banku ANZ Timor – Leste, no BNCTL reprezenta husi Diretor Ezekutivu, Sergio Maria Espirito Santo.
Ministru Estadu Koordenador Assuntu Ekonomiku, Estanislau da Silva hateten, akordu ida ne’e loke oportunidade tebes iha Timor - Leste, liliu ba populasaun sira iha area rural, atu bele asesu ba servisu bankária. Liuhusi implementasaun Mobile Phone Banking Solution, bele organiza populasaun nia negosiu no ekonomia ho seguransa di’akliu tan.
“Populasaun sira bele uza meius telefone ne’e, hodi hatene sira-nia saldo, halo transferensia, selu konta no seluk tan. Parabéns ba ba BNCTL no ba ANZ, tanba fó sai sira-nia koñesimentu hamutuk hodi fó asisténsia ba dezenvolvimentu. Ha’u fiar servisu ne’e sei la’o ba oin,” Ministru hatete.
Produtu ne’e bele desenvolvidu husi Banku rua ne’e konta mós ho komponente ida signifikativa ba formasaun no kapacitasaun finanseira. Tipu servisu hanesan ne’e, implementa ona iha nasaun barak husi Ásia-pasífiku no nia rezultadu pozitivu, liliu populasaun nia finanseira, liliu sira ne’ebé iha área rurais.
Hein katak iha tempu badak, fasilidade ne’e funsiona hanesan insentivu ba dezenvolvimentu inklusivu no harmonia Timor-Leste.
Partisipa iha asina akordu ne’e, Ministru Obras Públika, Transporte no Komunikasaun, Gastão de Sousa, Vise Ministru Finansas, Helder Lopes, Vise Ministru Komérsiu Indústria no Ambiente, Constâncio Pinto, Sekretária Estadu ba Apoiu no Promoção Sósiu ekonómika ba feto, Veneranda Lemos no Prezidente Administrativu BNCTL, Brígido de Sousa.
