Primeiru-Ministru Simu Vizita Embaixadór Indonésia Nian
Primeiru-Ministru Dr. Rui Maria de Araújo, simu vizita hosi Embaixadór Indonésianian, Primanto Hendrasmoro, kinta-feira, 26 fulan-marsu iha Palácio do Governo, Dili.
Iha hasoru malu ne’e Primeiru-Ministru, Dr. Rui Maria de Araújo, hateten katak, relasaun diak entre Timor-Leste ho nasaun vizinhu Indonesia hatudu duni maturidade polítika nasaun rua ne’e nian, tanba realidade hatudu katak sidadadaun indonésia barak hela iha Timor-Leste no sidadaun Timor-Leste nian barak mos hela iha Indonésia.
Primeiru-Ministru uza oportunidade ida ne’e, hodi apresia nasaun Indonésia ba sira nia suporta ba Timor-Leste nia polítika, iha prosesu adezaun nu’udar membru ba ASEAN ninian. Iha okaziaun ne’e, Dr. Rui Maria de Araújo, ko’alia mos kona-ba asuntu fronteira terrestre entre Timor-Leste no Indonésia ligadu ho problema droga no trafiku, ema tama ilegal, no ho krime organizadu. Primeiru-Ministru hatutan tan, Governu Timor-Leste mós, estabelese ona Konsellu ba Delimitasaun Definitiva Fronteiras Marítimas nian, no konsellu ne’e Primeiru Ministru rasik mak sei prezide. Tan ne’e, Primeiru-Ministru espressa hakarak atu assuntu ne’e bele diskuti entre nasaun Timor-Leste no Indonésia.
Iha fatin hanesan, Embaixadór Indonésia,Hendrasmoro, hato’o Governu Indonésia nia intensaun tomak atu kontinua koperasaun diak ho Timor-Leste no ida ne’e hatudu ona liu husi Nota de Entendimentu, deklarasaun konjunta no akordu iha área oin-oin ne’ebé asina ona entre nasaun rua ne’e.
Kona-ba asuntu fronteira terrestre entre Timor-Leste no Indonesia, Hendrasmoro, informa katak, durante ne’e iha koperasaun di’ak entre POLRI no PNTL hodi tau matan ba areas fronteira konjunta. Embaixador ne’e husu mós ba Governu Timor-Leste atu konsidera hahú negosiasaun kona-ba fronteira marítima entre nasaun Timor-Leste no Indonesia.
Iha parte investimentu Embaixador Hendrasmoro, hateten katak, entre Kamara Komersiu Industria (CCI) Timor-Leste no CCI Indonesia kria ona relasaun diak no tuir planu Prezidenti CCI Timor-Leste sei hasoru malu ho Prezidenti CCI Indonesia iha tempu badak. Iha parte ekonomia, Embaixador mos enkoraja Timor-Leste atu bele exporta nia produtu lokal ba iha nasaun Indonesia.
