Governu Timor-Leste Inaugura Otél Fortaleza no Sentru Kulturál no Patrimóniu Balibó
Governu Timor-Leste inaugura Otél Fortaleza no Sentru Kulturál Patrimóniu Balibó, Munusipiu Bobonaro, Sesta-feira, 20 Marsu 2015.
Ministru Planeamentu no Investimentu Estratéjiku, Kay Rala Xanana Gusmão, no Sekretária Estadu Arte no Kultura, Maria Isabel Ximenes, reprezenta Governu Timor-Leste, hamutuk ho Embaixadór Austrália, Peter Doyle, ofisialmente halo loke Otél ne’ebé hola fatin iha kapital Postu Administrasaun Balibo.
Ministru Planeamentu no Investimentu Estratéjiku, Kay Rala Xanana Gusmão, iha diskursu hateten, tinan hirak liubá, bainhira Indonezia hahú invazaun, jornalista na’in lima husi Austrália, Nova Zelándia no Reuni Unidu, lakon sira-nia vida iha Balibó, 16 Outubru 1975, tanba hetan tiru.
“Sira mai iha ne’e, laiha koneksaun ho ita. Maibé, sira iha hela risku ba mate, atu defenda ita. Sira mai atu hatete ba mundu tomak, saida mak akontese iha Timor,” eis Primeiru Ministru.
Nia hatutan, ohin-loron fatin ne’e sai istória ba jerasaun foun. Inaugurasaun ne’e, hanesan onra ida ba sira-na’in lima. “Projetu ne’e rasik fó fatin servisu ba foin-sa’e sira iha postu Balibó nian,” nia dehan.
Sekretária Estadu Arte no Kultura, Maria Isabel Ximenes, iha nia intervensaun esplika, Fortaleza Balibó ne’e antiga kavalaria Bobonaro nian. Governu halo esforsu tomak, atu prezerva nafatin patrimóniu istóriku ho kulturál sira.
“Ita-nia patrimóniu istóriku sira namkari iha rai Timor tomak. Tanba ne’e, tenki prezervar nafatin no hatudu ita-nia identidade nasionál,” nia dehan tan.
Embaixadór Austrália ba Timor-Leste, Peter Doyle, akresenta, serimónia ne’e istóriku no trájiku ba relasaun Austrália ho Timor-Leste.
“Otél Fortaleza no Sentru Patrimónia kultura sei hamriik hanesan memoriál ida ba Greg Shackleton, Gary Cunningham, Malcolm Rennie, Brian Peters no Tony Stewart. Fatin ne’e sei fó oportunidade ba vizitante sira, atu kuñese di’akliutan istória Timor nian”, Peter Doyle dehan.
Governu Austrália observa projetu ne’e iha poténsia atu kontribui sustentavelmente ba ekonomia lokál no fo oportunidade ba komunidade Balibó hodi hetan rendementu.
“Ne’e parseiru úniku entre programa kooperasaun dezenvolvimentu husi Governu Austrália, Balibo House Trust no setór privadu ne’ebé iha papél importante iha dezenvolvimentu. Parabens ba komunidade postu Balibó, espera povu husi nasaun seluk sei vizita Balibó no fatin sira seluk iha Timor,” Peter Doyle hatutan.
