Governu Timor-Leste

Hafoin hala’o tiha apresiasaun ba Programa Governu Konstitusionál VI, husi Parlamentu Nasionál iha loron 24 no loron 25 fulan-marsu nian, maka ohin loron 26 fulan-marsu, hahú ho prosesu avaliasaun Orsamentu Jerál Estadu nian (OJE) Retifikativu ba tinan 2015.

Ohin hahú ho prosesu kriasaun Komisaun Eventuál nian, ne’ebé maka sei fó sai Relatóriu no Paresér ba Proposta Lei n.^u 18/III (3.^a) – Alterasaun Dahuluk ba Lei n.^u 6/2014 (Orsamentu Jerál Estadu nian ba 2015).

Kuarta-feira oin mai, loron 1 fulan-abril, sei hahú diskusaun no aprovasaun ba OJE iha jeneralidade, ho durasaun loron ida, tuir kedas ho diskusaun no votasaun iha espesialidade, ne’ebé, konforme Projetu Deliberasaun n.^u 13/III (3.ª), ohin Parlamentu Nasionál aprova ona, ne’ebé “karik la mosu deliberasaun oin seluk, maka sei tama ba Plenáriu no labele liu loron rua tuirtuir malu”.

Ba tinan ida ne’e, propoin ona katak Orsamentu Estadu nian nafatin hetan osan dolar millaun rihun $1,57, iha aumentu ida menus husi porsentu 5% relasiona ho montante ne’ebé aloka iha 2014.

Despeza hirak ne’ebé hetan orientasaun hosi Planu Estratéjiku Dezenvolvimentu Timor-Leste nian ne’e, sei mantein ho “polítika antesipasaun ba despeza nian sira”, relasiona ho projetu infra-estruturas hirak prioritáriu, ne’ebé mak iha prazu médiu no naruk nia laran “sei kontribui ireversivelmente ba kreximentu ekonómiku.”