Primeiru-Ministru husu Igreja Katólika kontinua suporta iha área Edukasaun
Primeiru-Ministru Rui Maria de Araújo, simu vizita hosi Msgr. Joseph Marino, Núnsiu Apostóliku husi Kuala Lumpur, iha Palásiu Governu, sexta-feira, Loron 27 Fevreiru.
Iha hasoru malu ne’e, akompaña hosi Ministru dos Negósiu Estranjeiru no Kooperasaun, Hernâni Coelho no Msgr. Ionut Paul Strejac, Encarregado de Negósiu, ba Timor-Leste.
Msgr. Joseph, ne’ebe rona Primeiru-Ministru nia diskursu iha serimonia tomada de posse VI Governu, hetan inspirasaun boot tebes ho nune’e mai visita Primeiru-Ministru hodi ko’alia kona-ba asuntu Timor-Leste ho Vatikanu.
Primeiru-Ministru, husu ba Igreja Katólika atu bele kontinua fo sira nia suporta iha área edukasaun tanba durante ne’e Timor-oan barak mak hetan ona edukasaun iha eskola katólika, tan ne’e husu ba Msgr. atu Igreja katólika bele harii tan eskola katólika iha Timor-Leste.
Msgr. Joseph, mos fo nia importansia ba Edukasaun hanesan motto nia temi “Laiha edukasaun, laiha iha futuru”, tan ne’e nia fiar edukasaun iha nia impaktu boot ba sosiedade.
Msgr. Joseph, hatutan tan katak, sira sempre servisu hamutuk nafatin ho povu Timor-Leste, tanba sira sente povu Timor besik iha sira nia laran, sira kontribui buat hotu ne’ebé sira bele hodi kontribui iha área edukasaun nomos área sira seluk.
Sira hein katak servisu hamutuk Igreja no Governu sei kontinua ba futuru. Tuir planu, iha tempu besik, Vatikanu sei nomeia Bispu foun ba diocese Dili.
