Governu Timor-Leste

Primeiru-Ministru Rui Maria de Araújo, hala’o visita surpreza ba Portu Dili no Servisu Registu Verifikasaun Emprezarial, SERVE, hodi haree direitamente kondisaun servisu ne’ebé durante ne’e funsiona no pasa revista ba sasan sira ne’ebé importa husi estranjeiru mai Timor-Leste (26/02).

Iha portu Dili, Primeiru-Ministru akompaña husi Vise-Ministru Finansas, Hélder Lopes, Vise-Ministru Obras Públiku no Telekomunikasaun, Inácio Moreira, Diretór-Jeral Alfándega ho diretores sira,  pasa revista kotentór sira ne’ebé seidauk hasai husi Portu Alfándega.

Husi pasa revista ne’e Primeiru-Ministru no ekipa haree kontentór ida ne’ebé nia na’in dehan katak sira lori pesa kareta, maibé kuandu loke tiha kontentór la’os pesa kareta, maibé iha fali buldojer boot ida mak iha laran. Aleinde ne’e, iha mos kareta balun ne’ebé tama mai liu husi portu mais tinan kareta nee produs, liu tiha ona tinan lima no latuir prosedur ne’ebé iha, entaun kareta hirak ne’e la hetan lisensa hodi lori mai fan iha Timor-Leste.

Iha fatin hanesan, Primeiru-Ministru mós ba haree prosesu x-ray ba kontentór sira. Funsionáriu sira ne’ebé servisu iha área ne’e esplika ba Primeiru-Ministru katak, Alfándega iha ona mákina x-ray rua, Kada loron, makina ida bele halo x-ray ba kontentór hamutuk 15. Signifika kada loron, makina rua ne’e bele halo x-ray ba kontentor 30.

Husi inspesaun ida ne’e, Primeiru-Ministru hateten, Diresaun Jerál Alfándega iha ona sistema, maibé seidauk kompletu no sei falsa jestaun di’ak. Tan ne’e, Primeiru-Ministru husu ba Vise-Ministru Finansas no Vise-Ministru Obras Públiku no Telekomunikasaun atu buka lalais solusaun ba kondisaun hirak ne’e.

Husi Portu Dili, Primeiru-Ministru kontinua nia inspesaun ba iha Diresaun Nasionál Impostu Domestiku no Servisu Registu Verifikasaun Emprezarial (SERVE). Iha vizita ne’e, Primeiru-Ministru hateten, Governu nia polítika hamosu SERVE, hanesan servisu integradu atu fó atendimentu ba rejistu hodi hetan lisensa ba negósiu.

Maibé iha realidade, atendimentu sei la’o hela iha fatin tolu. Tuir loloos, Ministériu Justisa, MInistériu Komérsiu, Indústria no Ambiente no Ministériu Finansa tenki halo atendimentu iha fatin ida de’it mak SERVE ho naran one stop shop.

Tanba ne’e, Primeiru-Ministru husu atu implementa tuir polítika ne’ebé vigora tiha ona, hodi atende diak liu ba komunidadi sira ne’ebé hakarak rejista sira-nia negósiu.

Iha Diresaun Nasionál Impostu, sistema selu impostu ne’ebé trasa ona bele prosesa diak auditoria. Maibé, sei falta dadus konkretu kona-ba ema hirak mak selu impostu tuir lolos nia kategória. Primeiru-Ministru husu ba Vise-Ministeriu Finansas atu tau atensaun ba problema ne’ebé identifika ona hodi bele hetan nia solusaun.

Durante vizita ne’e, Primeiru-Ministru mós rona opiniaun no sujestaun husi husi funsionariu sira, negosiante no kompañia sira, atu bele hadia diak liu tan jestaun no sistema servisu iha instituisaun governu sira-ne’e.