Governu Timor-Leste

Primeiru-Ministru, Rui Maria de Araújo, partisipa iha Tomada de Posse ba orgaun Sosiais no atribuisaun prezidénsia de honra ba Timor-Leste, iha ótel Novo Turizmu, Dili (28/02).

Primeiru-Ministru, Rui Maria de Araújo, iha nia diskursu husu ba emprezáriu sira iha Konfederasaun Emprezarial Comunidade dos Paises de Lingua Portuguesa (CE-CPLP), atu tau programas ba asaun hodi alkansa objetivu nasaun membru CPLP sira nian.

Primeiru-Ministru agradese ho prezensa Emprezarius CPLP mai Timor-Leste, no iha esperansa katak objetivu fundamentál ne’ebé trasa tiha ona bele hametin diak liu tan konfiansa entre Estadu membru CPLP sira hodi hamenus pobreza atu nune’e promove dezenvolvimentu ne’ebe sustentável iha nasaun CPLP.

“Timor-Leste lokaliza iha kontinente Asiátiku, entaun distansia geografíka ida ne’e fo vantazen ba Timor-Leste iha setor ekonomia.” Tenik Primeiru-Ministru. Tan ne’e presiza reforsa kooperasaun iha área politiku, Diplomátiku, Kultural, Edukasaun no kooperasaun ba dezenvolvimentu entre nasaun CPLP.

Prezidente Meza Asembleia Jerál CE-CPLP, Jorge Rocha de Matos, iha biban ida ne’e hateten presiza reforsa liu tan setór ekonomia iha komunidade CPLP. Tuir Jorge, Komunidade CPLP iha riku soin barak maibé ekonómikamente seidauk liberta nia povu husi mukit. Tan ne’e nia husu ba nasaun CPLP atu adapta nia an ho mudansa globalizasaun.

Iha parte seluk, Prezidente eleitu Konfederasaun Emprezarial, Comunidade dos Pais da Lingua Portuguesa (CE-CPLP), Jorge Manuel de Araújo Serrano, hateten, durante nia mandatu tinan rua nia sei promove Timor-Leste hodi atrai investimentu iha rai liur, tanba país sira iha CPLP maioria iha kondisaun di’ak.

Tuir Jorge Serrano ho prezensa Timor-Leste iha CPLP, aleinde haree interese CPLP nian, Timor-Leste mos sei haree interese nasionál Timor-Leste nian. Nia fiar Timor-Leste bele investe iha rai sira seluk iha CPLP hanesan mos sira bele mai investe iha Timor-Leste

Jorge Serrano, sei lidera konfederasaun emprezariál CPLP durante periodu tinan 2014 to 2016.