Governu Timor-Leste

Ministru Justisa, Ivo Valente, akompaña husi Prokuradór Jerál Repúblika, José Ximenes, inaugura edifísiu foun prokuradoría Munisípiu Kovalima, seremónia ne’e hahú ho ko’a fita husi Ministru Justisa no hetán bensaun hosi Amu Pároku, José Maia, iha loron 25, fulan Fevereiru.

Konstrusaun edifísiu foun ne’e, hala’o husi kompañia Elfa Unipessoal ho totál orsamentu Estadu hamutuk osan dolár rihun hitunulu resin neen no atus haat walunulu (76,480), durasaun konstrusaun ba projetu ne’e fulan hitu hahú husi fulan Agustu, tinan  2014 to’o fulan Fevereiru, tinan 2015 .

Ministru Justisa, Ivo Valente iha intervensaun fó parabéns ba Prokuradór Jerál Repúblika, ne’ebé habelar daudaun ona edifísiu hodi loke espasu ba majistradu Ministériu Públiku iha Munisípiu Kovalima. Ministériu Justisa  nia polítika nian ba oin, mak loke tán edifísiu Ministériu Públiku nu’udar programa prinsipál ida ho planu alargamentu mapa judisiáriu iha Munisípiu hotu-hotu iha territóriu laran tomak.

Ministru Justisa hatutan, polítika ida ne’e atu asegura ema hotu-hotu hodi asesu ba justisa no nu’udar implementasaun artigu 26, konstituisaun RDTL, Ministériu Justisa mós sei nafatin kontinua fó apoiu ba Prokuradoría Repúblika, Tribunál, Defensór Públiku no advogado sira hodi kapasita rekursu umanu ne’ebé kualifikadu.