Ministru Justisa husu Diretór sira mellora servisu
Ministru Justisa, Ivo Valente husu ba diretór sira iha Ministériu ne’e atu hatudu dezempeñu, servisu maka’as hodi mellora di’ak liu tan. Tanba povu tomak iha espetativa boot no ezije atu hadi’a setór justisa.
Ministru Justisa hato’o ne’e iha Sentru Formasaun Jurídiku, Kaikoli, Dili, loron 19 fulan Fevereiru 2015, bainhira halo diskursu iha serimónia tomada de pose ba kargu xefia sira. Toma de pose ne’e fó husi Prezidente Komisaun Funsaun Públika, Libório Pereira.
Diretór sira ne’ebé simu posse kompostu husi, Dr. Henrique de Oliveira Ximenes nu’udar Diretór Jeral, Dr. Lucas Antonio da Costa (Inspetór Jeral), Eng. Antonio Fatima de Jesus (Sub-Inspetór), Dr. Crisogno da Costa Neto (Diretór Nasionál Administrasaun no Finansas) no Diretór Nasionál Direitus Umanus no Sidadania, Dr. Celito Cardoso.
“Onra boot mai ha’u, tanba nu’udar sasin ba seremônia ida-ne’e. Hanesan responsavél polítiku, ha’u husu ba imi ne’ebé simu posse, nu’udar aktu ofisiál, sei fó legalidade ba ita-boot sira-nia responsabilidade. Husu ba imi atu hatudu imi-nia dezempeñu servisu hodi mellora di’ak liu tan servisu iha Ministériu Justisa,”
Povu iha espetativa boot no ejijensia maka’as ba setór justisa, ne’ebé inklui Tribunál, Prokuradoria, Advogadu no Defénsoria Públiku Jerál. “Tinan lima mai, sei hasoru dezafiu oioin, ita hotu sei simu krítika no insultus. Maibé, ha’u fiar imi iha dómíniu kapasidade téknika, kompeténsia di’ak no maduru ona hodi hasoru kualker situasaun”, Ivo hateten .
Entertantu, Prezidente Komisaun Funsaun Públiku, Eng. Liborio Pereira, hateten, nomeasaun no promosaun funsionáriu públiku tuir duni regras Funsaun Públiku. Prosesu nomeasaun no promusaun iha funsaun públiku dinámiku tebes.
“Troka malu hanesan prosesu normál, ne’ebé akontese iha administrasaun públika. Tanba ne’e, uza didi’ak oportunidade ne’e hodi ezerse imi-nia knaar ho profesionalizmu. Promosaun ne’e fó mós poder, autoridade, autonómia no fasilidade hodi hala’o servisu atu atinji meta Ministériu Justisa, tuir Lei Órganiku VI Governu Konstitusionál,” Liborio dehan tan.
