Primeiru-Ministru hasoru malu ho Prezidente Repúblika
Primeiru-Ministru Governu Konstitusionál VI, Rui Maria de Araújo hasoru malu ho Prezidente Repúblika Timor-Leste, Taur Matan Ruak iha kinta-feira, loron 19 Fevereiru, hola fatin iha Palasiu Prezidensia, Aitarak Laran.
Visita ida ne’e hanesan visita ba dauluk ba Dr. Rui Maria de Araújo wainhira kaer nia pasta nudar Primeiru-Ministru Timor-Leste nian.
Iha hasoru malu ida ne’e, Primeiru-Ministru hato’o rezultadu husi reuniaun Konsellu Ministru nian ne’ebe halao iha tersa-feira, loron 17 Fevereiru, kona-ba aprovasaun ba Organika Governu Konstitusionál VI. Primeiru-Ministru mos follow up kona ba Dekretu-Lei balun ne’ebe V Governu Konstitusionál haruka ona mai Prezidensia, ne’ebe presiza hetan renovasaun antes halo submisaun fila fali mai Prezidensia hodi hetan promulgasaun.
Iha biban ida ne’e, Primeiru-Ministru ho Prezidente Repúblika halo mos reflesaun ba pontu balun ne’ebe Prezidente hato’o ona iha nia diskursu iha serimónia tomada de posse ba Governu Konstitusionál VI, kona-ba reforma administrasaun Publiku no harmonia ba lei sira.
Reflesaun ida ne’e fo hanoin ba Primeiru-Ministru ho Prezidente atu oinsa buka dalan dudu prosesu ida ne’e ba oin hodi bele hetan nia implementasaun.
