Governu Timor-Leste

Prezidente Komisaun Funsaun Públika, Eng^o. Libório Pereira, akompaña husi Ministru Administrasaun Estatál (MAE), Jorge da Conceição Teme, iha loron 29 fulan Janeiru fó asinatura termo de aseitação no termo de posse ba funsionáriu públiku Ministériu Adminsitrasaun Estatál (MAE) hamutuk 87 iha salaun Ministériu Administrasaun Estatál.

Ministru Administrasaun Estatal, Jorge da Conceição Teme iha nia diskursu hateten, funsionáriu públiku maka sai makina iha Estadu. Tanba ne’e,  aproveita tempu servisu ho dixiplina, profesionál no uza fasilidades Estadu hanesan kareta no motorizada ho di’ak.

“Ema barak husi Oecusse to’o Tutuala hakarak sai funsionáriu públiku. Maibé ita-boot sira mak hetan nomeasaun. Labeloe senti funsiunariu hanesan premiu ida, atu ita loko an, maibé tenki serbi ba povu ho fuan no laran tomak”, Jorge hateten.

Alende ne’e, Jorge da Conceição Teme informa, funsionáriu balun ne’ebé haruka ba servisu iha munisípiu, hato’o  ezijénsia barak no laiha responsabilidade atu servi ba públiku. “Husu ba funsionáriu públiku tomak atu iha nasionalizmu. Povu rihun resin maka mate tanba funu atu hetan libertasaun nasionál. Balun to’o agora la hetan sira-nia ruin, rate mos laiha. Sira la goza buat ida,” nia dehan tan .

Iha fatin hanesan, Presidente Funsaun Públika (KFP) Eng^o. Libório Pereira hateten, termo de posse signifika aseita atu kumpri lei Funsaun públika, fó onra ba konstituisaun, respeita programa Governu hodi la sai opozisaun ba Governu.

“Wainhira ministru ida troka no foun tama ita-boot sira kontinua hanesan funsionáriu públiku nafatin. Tenki prontu atu servisu ba Estadu, tama servisu tuir pontualidade, kumpri orden superior no aseita atu rai segredu iha funsaun públika, manan de’it interese Estadu bazeia ba artigo númeru 137 konstituisaun RDTL”, nia esplika.

Partisipa iha serimónia ne'e Diretór Jerál no Nasionál, Xefe Departamentu inklui funsionáriu sira ne'ebé simu termo de aceitação no termo de posse ho sira-nia família.