Governu Timor-Leste

Sekretáriu Estadu Polítika Formasaun Profisionál no Empregu, Ilídio Ximenes da Costa, inaugura uma lima ba kbiit laek, iha aldeia Daulorok, Suku Manlala, Postu Administrativu Soibada, Munisípiu Manatutu, iha loron 5 fulan-fevereiru.

Sekretáriu Estadu Polítika Formasaun Profisionál no Empregu, Ilidio Ximenes da Costa esplika, konstrusaun ne’e halo liuhusi programa empregu rurál harii uma ba komunidade sira ne’ebé kbit laek. Uma lima ne’e harii ho materiál lokál ho medida naruk metru 8 no luan metru 5. “Husu ba inan-aman sira ne’ebé mak hela iha uma ne’e, tenke kuidadu uma ne’e ba tempu naruk”, Ilidio hateten.

Diretór kompañia Riza Unip. Lda, Florindo Sarmento informa, konstrusaun uma lima ne’ebé hahú Maiu - Novembru 2014, uza orsamentu hamutuk $155.383.17.

Benefisiáriu Fernando Sarmento hateten katak, nia fó agradese ba governu liu-liu ba SEPFOPE tanba halo ona uma mahon ba kbi’it laek sira: “Ami agradese tebes ba governu bele ajuda ami, halo uma di’ak ba fó ami atu hela no husu ba SEPFOPE atu bele halo mós uma lima ba komunidade liu-liu ba sira kbit laek iha munisipiu seluk”.

Akompaña Sekretáriu Estadu, Ilidio Ximenes iha inaugurasaun ne’e, Sekretáriu Estadu Konsellu Ministru, Avelino Coelho, Vise Prezidente Komisaun D Asuntu Ekonomia no Dezenvolvimentu, Parlamentu Nasionál nian, Domingos Carvalho de Araújo.