Governu Timor-Leste

Ministru Administrasaun Estatal, Jorge da Conceição, hala’o vizita ida ba Arquivo Nacional iha loron 15 fulan-janeiru tinan 2015 atu hala’o sorumutu ida ho dirijente no funsionáriu sira servisu ne’e nian.

Iha okaziaun ne’e, Jorge Teme husu ba funsináriu sira Arquivo Nacional nian atu halo servisu ho kriatividade no inisiativa, hadi’a kualidade sevisu nian no hatudu sentidu responsabilidade nian ba sasán Estadu nian sira.

“Imi tenke kriativu, hodi organiza atividade sira hanesan palku muzikál no kadi-kakutak ba jerasaun foin-sa’e sira atu koñese istória Timor nian ne’ebé dezenvolve no promove liuhusi Arquivo Nacional. Ba jestór sira mós tenke simu ema hotu-hotu nia ideia, tanba sai funsionáriu atu servi povu no nasaun, la’ós atu servi de’it grupu ka indivíduu ida”, Jorge Teme hatutan.

Husi ninia parte, Diretór-Jerál Arquivo Nacional nian, Horácio do Santos Marques, aprezenta proposta balun, liuliu kona-ba reabilitasaun muru ne’ebé hale’u edifísiu Arquivo Nacional nian, no instalasaun servisu ida ne’e nian iha distritu hotu. Aleinde ne’e, nia mós foti kestaun kona-ba transporte no formasaun ba funsionáriu sira iha Arquivo Nacional inklui sira ne’ebé okupa kargu diresaun no xefia.

Parte ida husi inisiativa ne’ebé Ministru Administrasaun Estatál foti maka asina akordu ho Indonésia no Malásia atu halo filme istória nian ida kona-ba Oe-Cusse Ambeno.

Marka mós prezensa iha sorumutu ne’e maka Adjuntu Diretór-Jerál, Hermes da Rosa Correia Barros, xefe departamentu sira, funsionáriu sira Arquivo Nacional nian no mós estudante estajiáriu sira husi instituisaun superiór sira hanesan Universidade Nacional Timor Lorosa’e (UNTL) Universidade da Paz (UNPAZ), Universidade Oriental (UNITAL) no Institute of Business (IOB).