Governu Timor-Leste

Ministru Estadu no Negósiu Estranjéiru no Koperasaun, José Luís Guterres, reprezenta Estadu no Governu Timor-Leste, partisipa seremónia tomada de posse ba Filipe Jacinto Nyusi sai Prezidente Mozambike iha Maputo, loron 15 Janeiru 2015.

Mozambike oras nee mós tama  membru  organzaisaun CPLP, ne’ebé Timor-Leste mak lidera  durante tinan rua, hahu tinan 2014.

Timor-Leste nia partisipasaun iha seremónia ne’e importante tebes, tanba bele hametin liután lasu amizade ne’ebé estabelese tiha ona. Governu Mozambike mós apresia no agradese ba prezenesa husi Timor-Leste.

Iha vizita ofisiaal ne’e, Ministru José Luís Guterres transmite verbalmente felisitasoens hosi Primeiru-Ministru RDTL, Kay Rala Xanana Gusmão no Prezidénte Parlamentu, Vicente Guterres ba Prezidente Filipe Jacinto Nyusi no entrega karta husi Prezidente Repúblika Demokrátika Timor-Leste (RDTL), Taur Matan Ruak.

Durante enkontru diskuti kona-ba koperasaun bilaterál , inklui koperasaun ekonómika hanesan aspetu mina no gas, enerjia, justisa no edukasaun.

Entrentantu iha enkontru seluk ho Ministru Negósiu Estranjéiru Mozambike nian, Oldemiro Baloi, ko’alia asuntu koperasaun sira, inklui asuntu CPLP.

Ministru José Luís Guterres mós hasoru malu ho antigu Prezidente Mozambike, Joaquim Chissano, ne’ebé uluk hanesan Ministru Negósiu Estranjéiru Mozambike fó apoiu ba Timor-Leste nian luta no hasoru Eis-Prezidente Armando Emílio Guebuza.

Alemde ne’e, hasoru mós antigu Primeiru-Ministru, Pascoal Mocumbi, Ministru Saude, Leonardo Simão, Eis-Ministru Informasaun, Oscar Monteiro, no Diretór Intelijensia, Matias Xavier.

“Figura sira ne’e iha papél importante durante tempu Timor-Leste nia rezisténsia. Sira fó apoiu iha tempu defisil,” nia esplika.