Governu Timor-Leste

Iha loron 14 fulan-Janeiru, iha Ministério dos Negócios Estrangeiros [Ministériu Negósiu Estranjeiru] Dili,  Secretário de Estado para os Assuntos da ASEAN, [Sekretáriu Estadu ba Asuntu ASEAN nian], Roberto Soares,  entrega ofisialmente, hamutuk osan dolar tokon idarihun atus lima ba autoridade Malásia no Tailândia, hodi tulun  sira nia governu atu bele rezolve estragus ne’ebé hetan hosi tempestade tropikáll ne’ebé hanaran Jangmi, ne’ebé dadaun ne’e estraga tiha rejiaun ne,e,  afetadu liliu iha nasaun rua ne’e.

Desizaun hodi fahe apoiu finanseiru ne’e foti ona iha sorumutuk anuál ba dahuluk Conselho de Ministros [Konsellu Ministru] nian, iha loron 6 fulan-Janeiru, hanesan Sekretáriu Estadu Roberto Soares esplika tiha ona iha serimónia entrega ofisiál tulun umanitária ne’ebé fahe ona hosi Governu ba nasaun viziñu rua ne’e no belun sira hosi Timor-Leste: “Iha semana kotuk, Sua Exelénsia Primeiro-Ministro [Primeiru-Ministru] Kay Rala Xanana Gusmão, konvoka urjente sorumutuk estraordináriu Conselho Ministrus nian ida hodi diskute saida mak Timor Leste bele  halo no oinsá bele hatudu solidaridade Povu Timor-Leste  nian ba ita-nia belun sira  iha Malásia no Tailândia ne’ebé terus tanba inundasaun/bee sa’e. Durante hala’o servisu Sua Exelénsia Primeiro-Ministro hatudu nia-laran triste kona-ba situasaun ne’ebé mak ita nia belun sira iha Malásia no Tailândia sira hasoru, nune’emós membru governu durante diskusaun kona-ba rezolusaun  ba servisu kontribuisaun umanitária nian”.

Secretário de Estado [Sekretáriu Estadu] hanoin hikas ba apoiu ne’ebé fó hosi nasaun rua ba konstrusaun Timor-Leste nian: “seidauk lakon iha ema timor-oan  tomak nia hanoin saida mak Malásia no Tailândia halo hodi tulun Timor-Leste iha tinan terus nian, tinan 1999 no hafoin iha prosesu konstrusaun no konsolidasaun nasaun ne’e. Malásia no Tailândia hanesan belun sira ne’ebé mak besik liu ho Timor-Leste. Nasaun rua ne’e apoiu Timor-Leste iha situasaun ne’ebe mak difisil tebes. Nu’udar sinál solidariedade  povu no Governu Timor-Leste ba povu no governu Malásia no Tailândia , iha sorumutuk estraordinária  Conselho de Ministros iha loron 6 fulan-Janeiru tinan 2015 , Governu aprova ona alokasaun osan dolar tokon 1 hodi apoiu orsamentu ba governu no populasaun Malásia ho osan dolar rihun 500 ba Governu no populasaun Tailândia ne’ebé hetan dezastre ne’e”.

Atu hateten liutan katak provínsia hirak iha Malásia inklui Perlis, Perak, Kelantan, Trengganu no Pahand ne’ebé afetadu hosi tempestade ne’e, hodi halo ema rihun ba rihun desloka hosi sira nia hela fatin  no pelumenus ema na’in ruanulu mak mate. Iha Tailândia mós  hatete katak iha rejiaun ualu ne’ebé mak dekreta estadu kalamidade. To’o agora ema liu hosi rihun-ruanulu maka evakua ona.