Governu Timor-Leste

Empreza internasionál Heineken, iha loron 8 fulan-janeiru nian, asina tiha ona akordu formál ida ho Governu Timor-Leste. Empreza internasionál husi Olanda ne’e, hanesan produtór boot serveza nian datoluk iha mundu, sei investe besik dolar millaun 40 atu harii fábrika bebida nian ida besik Dili. Projetu ne’e, tuir previzaun, sei hahú funsiona iha tinan rua oin mai, sei kria postu servisu diretu hamutuk 200 no indiretu hamutuk 800.

Iha serimónia asina akordu ne’e nian, Administradór Ezekutivu Heineken Asia Pacific nian, Roland Pirmez elojia tebetebes prosesu negosiasaun nian ne’ebé halo ona ho Governu no dehan katak “Timor-Leste iha ambiente ida ne’ebé di’ak tebetebes ba investimentu husi estranjeiru”.

Ba Vise-Primeiru-Ministru, Fernando La Sama de Araújo, parseria ida ne’e hatudu katak nasaun ne’e hetan dadaun ona fiar husi empreza internasionál boot sira. Ulun boot ne’e  mós dehan “ Planu Estratéjiku Dezenvolvimentu Timor-Leste 2011-2030 prevé katak sustenbalidade nasaun nian iha futuru depende ba konstituisaun setór privadu ida ne’ebé maduru”, hodi garante katak Governu “sei fó prioridade ba konstrusaun ambiente negósiu no investimentu nian sira ne’ebé apoia aranke no espansaun setór ne’e nian”.

Molok asinatura akordu ne’e ninian, iha loron 1 fulan-janeiru, Governu Timor-Leste estabelese ona mós Ajénsia Espesializada Investimentu nian (www.invest-tl.com). Tuir Sekretária Estadu ba Apoiu no Promosaun Setór Privadu, Veneranda Martins, misaun ajénsia ne’e ninia maka “dada investimentu atu diversifika ekonomia no hamenus dependénsia ba mina-rai”.