Governu Timor-Leste

Vise-Ministru Negósius Estranjeirus no Koperasaun, Dr Constâncio da Conceição Pinto halao enkontru ho Embaixadór Estraordináriu no Plenipotensiáriu Ukrania ho rezidénsia iha Malázia, Ilhor V. Humennyi, iha loron 04 Dezembru 2014, iha Sala Reuniaun, MNEK.

Embaixadór mai koalia kona-ba konflitu iha Ukránia ne’ebé lao hela i ao mesmo tempo husu ita-nia apoiu ba sira-nia kandidatura ba Non-Permanent Seat iha Konselhu Seguransa ONU nian,” esplika Vise-Ministru.

Entretantu iha reuniaun, Vise-Ministru Constâncio Pinto husu ba Embaixadór Ukranianu para bele iha vizita interkambiu entre Timor-Leste ho Ukránia.

Vise-Ministru haktuir mos katak “kona-ba koperasaun entre Timor-Leste ho Ukránia, ita seidauk iha akordu bilaterál ida ho sira. Tamba ne’e, sei esplora posibilidade ba akordu ida entre ita ho Ukránia, tanba sira dehan katak bele fó bolsas estudus mai ita depois koperasaun seluseluk tán.”

Durante reuniaun, Vise-Ministru akompaña husi Diretór Nasionál ba Europa, Armindo Pedro Simões ho Pontu Fokál ba Europeu Leste, Sul no Sentrál, Martinho da Cruz Lopes.