Governu Timor-Leste

Prezidente Repúblika, Taur Matan Ruak, loron 27 Novembru 2014 inaugura uma lima ba kbiit laek iha Aldeia Bularema, Suku Seloi Malere, Sub Distritu Aileu, Munisipiu Aileu.

Akompaña Prezidente Taur Matan Ruak iha inaugurasaun ne’e, Primeira Dama, Isabel Ferreira, Sekretáriu Estadu Polítika Formasaun Profisionál no Empregu, Ilidio Ximenes da Costa no Administradór Munisipiu Aileu, Martinho Matos.

Prezidente Repúblika Demokrátika Timor-Leste, Taur Matan Ruak senti kontente bele inaugurasaun uma lima ba kbiit laek sira, ne’ebe harii hosi SEPFOPE ho kualidade di’ak tebes.

Estadu Timor-Leste, tuir Prezidente Repúblika, iha obrigasaun boot tolu iha proses harii nasaun mak, presta servisu báziku ba populasaun sira, garante seguransa sosiál ba ita-nia sidadaun no kria oportunidade atu sidadaun sira aproveita hodi dezenvolve moris no involve nia an ba dezenvolvimentu nasionál.

“Esforsu atu harii uma sira-ne’e, enkuadra estadu nia papel importante ho presta servisu báziku no seguransa sosiál ba ita-nia populasaun sira”, Prezidente hateten.

Ba tinan hirak nian laran, Estadu Timor-Leste tenta halo esforsu haree hetan modelu uma ne’ebé di’ak no loron ikus bele haboot no haluan liu tan iha rai laran, atu fó ba populasaun sira ne’ebé kbiit laek.

“Uma ne’ebé mak ita halo, ekonómika ho konfortavel. Sira ne’ebé mak hela, tenke senti katak uma ne’e ninian duni. Uma ne’e di’ak atu hela ho seguru no akomoda nia aan iha fatin ne’e ba tempu naruk,” Prezidente hateten.

Ilídio Ximenes da Costa esplika katak “SEPFOPE buka oinsá atu bele utiliza potensialidade kada distritu, hanesan uma ho tizolu kesi lokal. Ne’e bele redúz ita-nia dependénsia ba materiál husi loja. Ho mehi no inspirasaun ida-ne’e, ami hahú koko halo no husik buat ruma. Maski simples, ita buka atu halo  uma ba kbiit laek ho kualidade di’ak”.

 Entertantu Administradór  Munisipiu Aileu, Martinho Matos husu ba uma na’in sira atu kuidadu didi’ak. Husu mós ba lider komunitaria sira atu fó apoiu nafatin, ba sira ne’ebé simu uma ne’e.

Benefisiáriu Joana Mendonça, tinan 45, sente kontente simu uma di;ak husi Governu. “Uma di’ak ba ami na’in lima ne’ebé kbiit laek. Ami agradese no simu ho liman rua no sei kuidadu didi’ak. Se bele tina oin bele halo tan ba ami-nia maluk barak ne’ebé sei faluk,” Joana hateten.

Inaugurasaun ne’e, selebra liuhusi Prezidente asina plaka ida, tesi pita no halo bensaun Maromak nian husi Amu Pároku Sáo Pedro e São Paulo Aileu, Hendrique de Deus.

Programa uma lima hanesan projetu pilotu, liu hosi Diresaun Empregu Rural iha SEFOPE, konstrusaun hahú fulan Jullu 2014, ho medida naruk metru 8 no luan metru 5, kompostu kuatru tolu, sala han, sala vizita no haris fatin ida.

Partisipa  hodi asiste inaugurasaun ne’e, membru governu no membru parlamentu balun, doadór sira no komunidade iha area ne’ebá.

Iha biban ne’e SEPFOPE entrega mós sertifikadu ba sira ne’ebé apoiu no ajuda kaer obra uma ne’e mak membru F-FDTL nain 9, enjeñeiru SEPFOPE nian nain 5, formandu sira hosi sentru formasaun Tibar na’in 4 no Diretór Kompañia, Francisco de Jesus.