MOP no SEPI organiza workshop sensibilizasaun ba jéneru
Ministériu Obras Públikas (MOP), liuhosi nia grupu Traballu ba Jéneru Nasionál, servisu hamutuk ho Sekrétaria Estadu Polítika Promosaun Igualdade Jéneru (SEPI) hala’o workshop iha Dili, loron 19 Novembru kona-ba sensibilizasaun jéneru ba kargu diresaun no xefia iha Ministériu Obras Públikas.
Ministru Obras Públikas, Gastão de Sousa, hateten, iha workshop ne’e opurtunidae di’ak ba kargu xefia MOP sira, atu komprende didi’ak saida mak SEPI nia servisu no objetivu promove jéneru ba iha ita-nia ministériu.
Iha komemorasaun loron nasionál feto, 7 Novembru liuba, Ministériu Obras Públika prémiu ba promosaun igualdade. “Agradese ba ita-boot sira-nia esforsu tomak, bele hetan prémiu ne’e. Maibé, labele para de’it iha ne’e. Buat barak ita tenke halo. Husu ba xefia sira, atu intende didi’ak hodi promove igualdade jéneru iha ita nia ministériu nia laran”, Ministru dehan tan.
Ministru mós agradese ba SEPI ne’ebé fahe hanoin ba MOP atu bele integra idea saida mak sensibilizasaun jéneru. “Dala barak, ami hanoin de’it oinsá bele hadi’a estrada, bee no eletrisidade. Maibé tenke hahú presta mos iha parseiru ka oinsá involvementu feto sira iha prestaun servisu ba ita nia populasaun”, Ministru apela.
Diretora Jerál interina SEPI, Maria José Sanches esplika, SEPI hanesan governu nia orgaun prinsipál ne’ebé responsabiliza halo planu, koordenasaun, avaliasaun ba polítika promosaun no defeita iguladade jéneru, ne’ebé difini ona iha Konsellu ministru.
Diretora Jerál ne’e informa, polítika abordajen integradu jéneru iha Timor-Leste sai hanesan papél prioridade SEPI hodi responde planu estratéjiku dezenvolvimentu 2011-2030. Governu garante katak tinan 2030, Timor-Leste sei sai sidade ida ne’ebé justu ba jéneru, valoriza feto no direitu dignidade umanu, proteje no promove liu hosi lei no kultura. Atu alkansa objetivu ida-ne’e presiza esforsu maka’as hosi entidade hotu-hotu,.
“Tinan 2014 SEPI konsege analiza hamutuk planu asaun 24 inklui mós Ministériu Obras Públikas. SEPI sujere ba MOP, konsidera ekilibru entre feto no mate iha prosesu formasaun, projetu no rekursu umanu. Iha tempu hanesan, enfaze kada ministériu atu sensivel ba jéneru,” Diretora Jerál Maria Sanches reafirma.
