Sorumutu ho Embaixador Extraordinariu no Plenipotensiariu India nian
Ministru Negósiu Estranjeiru no Koperasaun Interinu, Constâncio Pinto, iha loron 29 fulan-outubru halao sorumutu ho delegasaun India nian ne’ebé kompostu husi Embaixador Extraordinariu no Plenipotensiariu India ba Timor-Leste, Gurjit Singh ho grupu emprezariu sira husi India ne’ebé konsentra iha area explorasaun mineira, industria no konstrusaun nian.
“Reuniaun ida ne’e hanesan segimentu ba visita ne’ebé mak Embaixador India
nian halo uluk tiha ona. Foin dadaun ne’e, ami nain rua enkontru mos iha Bali, durante reuniaun Bali Democracy Forum. Iha ne’ebá, ami koalia kona-ba assuntu tolu: ida mak visita delegasaun emprezariu Indianu sira mai Timor-Leste, assuntu ida mak kona-ba estabelesimentu sentru IT nian iha Dili no terseiru kona-ba sira nian hakarak hetan ema ida ba sira nian Konsul Honorariu iha Timor-Leste. Hau hanoin ida ne’e inisiativa ida diak teb-tebes para atu bele hametin ita nian koperasaun ho India”, haktuir Constâncio Pinto.
Constâncio Pinto hatutan katak Governu India iha interese hakarak habelar liu tan koperasaun ho Timor-Leste. Governu India mos hakarak fo tratamentu especial ba Timor-Leste nian produtu sira ne’ebé atu tama ba India ho kondisaun free tariff ka la kona taxa.
Akompanha Embaixador Extraordinariu no Plenipotensiariu, Gurjit Singh iha visita ida ne’e mak investor sira ne’ebé mai husi kompañia bo’ot ne’ebé involve iha konstrusaun ba kamiñu ferro, aeroporto, explorasaun mineiru no agrikultura.
