Konferénsia Internasionál II kona-ba Desentralizasaun no Podér Lokál
Konferénsia Internasionál II kona-ba Desentralizasaun no Podér Lokál, ne’ebé hala’o iha loron 30 no 31 fulan-outubru, iha Díli ne’e Sekretaria Estadu Desentralizasaun Administrativa (SEDA) maka organiza. Konferénsia tinan ida-ne’e nian, ho ninia títulu “Administrasaun lokál ida ba servisu dezenvolvimentu Timor-Leste nian”, konta ho prezensa husi oradór nasionál no internasionál sira ho objetivu atu analiza servisu ne’ebé halo tiha ona durante tinan ida ikus ne’e no ko’alia kona-ba estratéjia atubele estimula reforma Administrasaun Lokál nian ne’ebé hahú tiha ona.
Vise-Primeiru-Ministru, Fernando La Sama de Araújo, halo diskursu maklokek nian dahuluk, no iha ninia lia-fuan sira, nia insentiva atu servisu hirak ne’ebé hala’o tiha ona no esforsu sira atu hadi’a servisu públiku ne’ebé fó ba populasaun sira la’o nafatin ba oin. Ministru Administrasaun Estatál, Jorge Teme, ne’ebé mai mós iha abertura ne’e ko’alia liu kona-ba importánsia husi prosesu desentralizasaun administrativa nu’udar instrumentu atu promove dezenvolvimentu lokál.
Iha dadersan loron dahuluk nian ne’e, iha intervensaun haat husi membru Governu nian sira. Sekretáriu Estadu Desentralizasaun Administrativa, Tomás do Rosário Cabral, ko’alia kona-ba implementasaun reforma administrativa, no tuir fali nia maka Sekretáriu Estadu Fortalesimentu Institusionál, Francisco Soares, ne’ebé ko’alia kona-ba importánsia atu forma lideransa lokál sira ne’ebé iha kapasidade atu dezenvolve no implementa polítika lokál sira kona-ba dezenvolvimentu. Samuel Mendonça, Sekretáriu Estadu Dezenvolvimentu Lokál, ko’alia kona-ba evolusaun prosesu desentralizasaun administrativa no ninia ligasaun ho programa sira kona-ba prosesu dezenvolvimentu lokál, no parte dahuluk nian ne’e taka ho intervensaun husi Sekretaria Estadu ba Apoiu no Promosaun Setór Privadu, Veneranda Lemos Martins, ne’ebé ko’alia kona-ba estratéjia atu dezenvolve setór privadu iha área rurál sira no ninia importánsia ba kriasaun munisípiu sira.
Iha parte lorokraik, koferensista sira iha biban hodi asiste aprezentasaun sira husi reprezentante sira husi Estadu Victória (Austrália) nian no husi Portugál, ho sira ne’e maka SEDA halo protokolu kooperasaun nian ne’ebé haree ba kriasaun órgaun Podér Lokál nian sira iha Timor-Leste.
Husi Local Government Department Estadu Victória (Australia) nian, reprezenta husi ninia Diretór, Colin Morris, iha nia intervensaun nia esplika kona-ba modelu organizasaun, funsionamentu no finansiamentu Podér Lokál Victória nian no modelu atu identifika servisu lubun ne’ebé autarkia lokál sira halo kompostu husi governu.
Husi Portugal, Carlos Carreira, Ajente Kooperasaun nian, maka reprezenta. Iha ninia intervensaun nia ko’alia kona-ba estratéjia kooperasaun nian ne’ebé estabelese ona entre munisípiu sira husi Portugál no husi Timor-Leste atubele kria Podér Lokál.
Partisipante sira mós hetan esplikasaun kona-ba aspetu espesífiku balun modelu husi Podér Lokál nian, husi Estadu Victória nian no mós Portugal.
Iha konferénsia ne’e iha mós intervensaun husi Administradór Munisipál Aileu no Liquiçá nian ne’ebé aprezenta perfíl sósioekonómiku munisípiu sira ne’e nian, atubele prepara proposta estratéjika lokál nian sira kona-ba dezenvolvimentu, ne’ebé Konsellu Konsultivu Lokál sira maka sei debate. Oradór sira identifika tiha ona potensiál husi sira-nia munisípiu sira no estratéjia ne’ebé bele halo atu aproveita potensiál ne’e hodi hadi’a kondisaun moris sira nia populasaun nian no dezenvolve sira nia komunidade.
Iha Konferénsia Internasionál II kona-ba Desentralizasaun no Podér Lokál ne’e, Sekretáriu Estadu Desentralizasaun Administrativa, Tomás do Rosário Cabral, asina mós protokolu ida ho munisípiu Porto nian, ne’ebé João Paulo da Cunha, Xefe Divizaun Munisipál Relasaun Internasionál no Protokolu Kámara Munisipál Porto nian, maka reprezenta, ho hanoin atu kria Podér Lokál iha Baucau. Protokolu ida-ne’e hafoun fila-fali interese husi autarkia portugeza nian sira hodi kontinua fó tulun ba prosesu desentralizasaun administrativa no konstrusaun Podér Lokál iha Timor-Leste, hodi intensifika no hametin liután relasaun amizade no kooperasaun nian entre Baucau no Porto.
Loron daruak, no nu’udar loron ikus nian, konferensista kria grupu servisu temátiku hodi diskuti kle’an liután no fó biban ba partisipante sira atu halo proposta konkreta sira kona-ba tema ida-idak ne’ebé ko’alia tiha ona: dezenvolvimentu prosesu desentralizasaun administrativa; fortalesimentu lideransa sira no Administrasaun Lokál; promosaun dezenvolvimentu lokál nian; kriasaun setór privadu iha área rurál sira.
