Governu Timor-Leste

Ministru Negósiu Estranjeiru no Koperasaun Interinu, Constâncio Pinto halao sorumutu ho Katherine Duffy Dueholm, Enkaregada Negósiu husi Embaixada Estadus Unidus Amerika, iha loron 29 Outubru 2014, iha Ministériu Negósiu Estranjeiru no Koperasaun, Dili.

Durante sorumutu, parte rua diskuti kona-ba kestaun sira ne’ebé iha relasaun ho koperasaun bilateral entre rai rua ne’e, mak hanesan kordenasaun asistensia bilateral, resolusaun hirak ne’ebé parte Estadus Unidus Amerika husu atu Timor-Leste bele apoiu iha Assemblia Jeral Nasõens Unidas nian, kestaun importasaun ho exportasaun, koperasaun iha area seguransa, apoiu Estadus Unidus ba Timor-Leste nian kandidatura ba ASEAN, kontribuisaun Timor-Leste nian iha prosesu kombate hasoru moras Ebola, assuntu kona-ba ofisial ligasaun ba fronteira no kestaun sidadã Amerikana ne’ebé oras ne’e autoridade Timor-Leste prosesa hela relasiona ho alegasaun ba kazu droga nian.

“Bazikamente, reuniaun ohin ne’e para atu atualiza informasaun ba maluk ona ba ita nian koperasaun bilateral nomos Estadus Unidus Amerika nian pedidu ba Timor-Leste hodi fo apoiu ba resolusaun hirak ne’ebé atu diskute iha Nasõens Unidas”, katak Constâncio Pinto.

Iha sorumutu ne’e mos, Estadus Unidus Amerika liu husi ninia Enkaregada Negósiu expresa sira nian prontidaun atu fo’o apoiu ba prosesu adezaun Timor-Leste ba ASEAN liu husi asistensia téknika kona-ba assuntu ASEAN ne’ebé sei foka liu iha area ekonomia nian.

Constâncio Pinto haktuir “Relasiona ho ita nian kandidatura ba ASEAN nian ne’e, Amerika pronto atu fo apoiu ba iha area agrikultura, liu-liu kona-ba kontrolu kualidade ai-han no hijeniku. Hau hanoin ida ne’e diak, tamba se ita kumpre ona kriteriu sira ne’ebé iha, ita bele mos exporta ona sasan ba merkadu ASEAN nian no merkadu sira seluk. Ne’ebé, hau hanoin parte ida pozitivu tebes”.

Marka mos prezensa iha reuniaun ne’e mak John H. Seong, Diretor Misaun USAID iha Timor-Leste ho Vânio Florival, Diretor Nasional Koperasaun Timor-Leste ho Amerika nian.