Governu Timor-Leste

Sekretáriu Estadu Desentralizasaun Administrativa, Tomás do Rosário Cabral, hala’o vizita serbisu nian ida ba Estadu Victoria, iha Austrália, iha loron 14 no loron 17 fulan-outubru.

Tuir ajenda, atividade hirak ne’ebé Sekretáriu Estadu sei hala’o iha vizita serbisu nian ne’e maka, asina protokolu kooperasaun nian rua iha área desentralizasaun administrativa; sorumutu serbisu nian ida ho Mayor de Ballarat no partisipa iha konferénsia “Power to the People” ne’ebé Asosiasaun Munisípiu sira Victoria nian maka organiza.

Iha loron 16 fulan-outubru, Tomás do Rosário Cabral, asina protokolu kooperasaun nian rua, iha área desentralizasaun administrativa nian ho City of Moonee no Indigo Shire. Protokolu rua ne’e ninia objetivu maka fortalesimentu relasaun kooperasaun entre Governu Repúblika Demokrátika Timor-Leste no Governu Lokál sira Estadu Victoria nian, ne’ebé sei haree ba fortalesimentu kapasidade institusionál Administrasaun Lokál Timor-Leste nian no troka koñesimentu no esperiénsia iha área sira hanesan ekonomia, sosiál, edukasaun no kulturál. Protokolu kooperasaun nian rua ne’ebé asina ho

Moonee Valley no Indigo hametin liután kooperasaun ne’ebé estabelese ona ho Ballarat, Darebin, Yarra no Wangaratta, iha Estadu Victoria no protokolu ne’ebé asina tiha ona ho Darwin, iha Territóriu Norte nian.

Iha ámbitu protokolu kooperasaun nian ne’ebé asina iha loron 28 fulan-jullu tinan 2014, ho konsellu Ballarat nian, Sekretáriu Estadu Desentralizasaun Administrativa, iha oportunidade hodi hala’o sorumutu serbisu nian ida ho Mayor de Ballarat no responsavel barak governu lokál ne’ebá nian. Iha sorumutu ne’e, ne’ebé ho objetivu hametin liután relasaun kooperasaun nian sira, ne’ebé formaliza uluk tiha ona, liuhusi realizasaun inisiativa konkreta sira kona-ba promosaun dezenvolvimentu lokál distritu/munisípiu sira Timor-Leste nian, Tomás do Rosário Cabral, iha oportunidade hodi ko’alia kona-ba importánsia atu estabelese estratéjia koooperasaun nian komún, koerente no armonioza ida entre parseiru oioin australia nian ba kooperasaun, iha área desentralizasaun administrativa.

Local Government Department husi Estadu Victoria oferese han-kalan ida hodi simu Sekretáriu Estadu Desentralizasaun Administrasaun, iha okaziaun nia hakat ba Melbourne no Ballarat atu partisipa iha Konferénsia “Power to the People”, ne’ebé Asosiasaun Munisípiu sira Victoria nian maka organiza. Marka prezensa iha eventu ne’e maka, responsavel sira ba Administrasaun Lokál Estadu Victoria nian, nune’e mós governante lokál oioin no mós dirijente sira husi servisu munisípiu nian ne’ebé ho sira Sekretaria Estadu Desentralizasaun Administrativa iha ona akordu kooperasaun iha área desentralizasaun nian.