Ministériu Justisa Lansa Projetu Sistema Nasionál Kadastru
Primeiru-Ministru Repúblika Demokrátika Timor-Leste, Kay Rala Xanana Gusmão no Primeiru-Ministru Repúblika Portuguesa, Pedro Passos Coelho, hamutuk ho Ministru Justisa, Dionísio Babo, lansa projetu Sistema Nasionál Kadastru (SNK), loron 25 Jullu 2014 iha edifísiu SNK, Kintál Boot, Díli.
Ministru Justisa Dionísio Babo hateten, implementasaun projetu SNK ne’e atu halo levantamentu ba rai hodi hatama dadus ba sistema modernu ho teknolójia foun. Timor-oan sira ne’ebé tuir formasaun no integra iha projetu ne’e hamutuk na’in 150. Tuir planu, iha futuru Timor-oan hirak ne’e sei hala’o servisu iha Sekretária Estadu Terras no Propriedade nia okos.
Ministru Justisa hatutan liután, durante okupasaun portugés to’o agora, Timor-Leste seidauk iha Sistema Kadastru Nasionál hodi akumula dadus kona-ba rai. Maibe agora Konsellu Ministru aprova ona projetu SNK, hodi implementa iha Timor-Leste, durante tinan 6 ho objetivu halo levantamentu dadus ba rai iha territóriu Timor tomak.
“Sira halo levantamentu hodi garante dezenvolvimentu rai iha nasaun ne’e. Husu ba Timor-oan hotu, atu koopera ho ekipa SNK, fó informasaun loloos kona-ba rai iha territóriu laran. Tanba informasaun sira-ne’e sei fó benefísiu ba povu, atu bele hetan sertifikadu ba rai, “ Dionísio Babo dehan.
Projetu ne’e realiza tanba servisu hamutuk entre kompañia Grupo Média Nasionál (GMN) ho kompañia Holding Arm Apprize hosi Portugál, nian hodi halo levantamentu kadastrais iha Distritu sira.
