Timor-Leste aumenta ba Dolar Amérika nian millaun rua hodi tulun nasaun sira husi g7+ ne’ebé hasoru Krize Ébola
Iha sorumutuk estraordináriu Konsellu Ministrus nian, ne’ebé hala’o iha Dili, iha loron 2 fulan-outubru tinan 2014, Governu Repúblika Demokrátika Timor-Leste hakotu ona hodi aumenta husi millaun ida ba millaun rua dolar amerikanu hodi tulun nasaun sira husi g7+ nian hasoru Krize Ébola, ne’ebé fó sai ona iha Novaiorke, iha loron 2 fulan-setembru, iha Eventu Paralelu Nível Aas g7+ nian, hala’o ona iha Nasoins Unidas, ne’ebé mak Primeiru-Ministru Xanana Gusmão mós partisipa. Desizaun ne’e foti tanba krize husi epidemia ne’e maka’as tebes, ne’ebé halo Organizasaun Saúde Mundiál deklara estadu “emerjénsia internasionál.”
Atu hetan asesu ba informasaun no imajen sira kona-ba sorumutu g7+, klike iha ne’e.
Atu hetan asesu ba diskursu Primeiru-Ministru nian iha Sorumutuk Ministeriál Altu Nível Kona-ba Pas no Instituisaun sira hanesan Objetivu Autónomu iha Ajenda Dezenvolvimentu nian Pós-2015, klike iha ne’e.
Iha dezlokasaun ba Novaiorke ne’e, Primeiru-Ministru Xanana Gusmão mós partisipa, iha Asembleia-Jerál Nasoins Unidas nian ba da-69, ne’ebé nia halo diskursu ida, hodi hatete katak: “Maske Sekretáriu-Jerál no nia ekipa iha ONU halo ona esforsu maka’as, ita sei tama ba tinan 2015, hodi hatene katak ema besik millaun 2,2 iha mundu maka sai ona ka sei sai kiak tebes, sein hatene sa’ida de’it maka Objetivu sira husi Dezenvolvimentu Miléniu ne’e”.
