Governu Timor-Leste

Ida-ne’e maka tema ne’ebé Sekretaria Estadu Komunikasaun Sosiál (SEKOMS) hili iha semináriu internasionál ida, iha loron 14 fulan-Agostu, iha Dili, konta ho partisipasaun hosi oradór nasionál no internasionál nian sira.

Atu ko’alia kona-ba dezafiu no oportunidade ne’ebé iha ligasaun ho kriasaun Ajénsia Notísia ida iha Timor-Leste (ANTL), konvida bainaka hosi rai-laran sira eis-Primeiru-Ministru Timor-Leste, Marii Alkatiri no eis-Prezidente Repúblika, José Ramos-Horta. Nu’udar oradór internasionál nian sira, semináriu ne’e konta ho Rahmat Nasution Dahlan, Diretór Ezekutivu ANTARA (Ajénsia Notísia Indonézia) nian, Rogério Gomes, Vise-Administradór LUSA (Ajénsia Notísia Portugál) nian, nomós António Sampaio, jornalista korrespondente LUSA nian.

Iha sesaun maklokek, Sekretáriu Estadu Komunikasaun Sosiál, Nélio Isaac Sarmento, ko’alia liu kona-ba objetivu semináriu ne’e: “halibur hanoin sira hodi harii ajénsia notísia ho objetivu hodi promove diversidade informasaun no koezaun nasionál ba dezenvolvimentu nasaun nian”.

Nélio Isaac Sarmento ko’alia mós kona-ba nesesidade formasaun rekursu umanu nian no importánsia testemuñu hosi ajénsia notísia nian, ne’ebé mak iha ona parseria ida, maibé mós testemuñu hosi ema-boot nasionál sira ne’ebé iha papél importante tebetebes bainhira serbisu iha “ajénsia notísia klandestina nian” no oinsá enkoraja jerasaun sira atu iha espíritu krítiku, iha loron-ohin nian.

Ko’alia kona-ba importánsia ajénsia notísia ida iha nasaun ida ASEAN nian, Diretór Ezekutivu ANTARA, Rahmat Nasution Dahlan, dehan katak “ajénsia notísia ida halo parte nesesidade hosi nasaun ida nian. Ba Governu, ne’e hanesan veíkulu ida-ne’ebé bele fiar, ba populasaun sira, ne’e hanesan fonte ida ne’ebé fó informasaun loloos nian”.

Marii Alkatiri fali, ko’alia kona-ba relasaun ajénsia notísia nian ho interese nasionál “kreximentu demokrasia hodi hametin Estadu no oinsá komunikasaun sosiál tenke hatene akompaña evolusaun ne’e” la haluha ”reforsu sentidu krítiku ho objetividade boot no profesionalizmu, ne’ebé sai hanesan airin prinsipál rua atu hetan informasaun ida-ne’ebé loloos no tulun atu rezolve problema sira la’ós atu hamosu fali problema”.

Kona-ba ninia funsionamentu, Rogério Gomes hateten loloos “katak ajénsia ida-ne’ebé fa’an servisu no órgaun komunikasaun sosiál maka iha kompeténsia atu trata editoriál notísia nian, naran katak informasaun ne’e rigoroza no objetiva”.

Iha baluk-daruak semináriu ne’e nian, José Ramos-Horta mós ko’alia kona-ba “importánsia ajénsia notísia ba-iha fortalesimentu relasaun diplomátika nian sira entre nasaun sira”, no jornalista korrespondente LUSA nian, António Sampaio, ko’alia kona-ba esperiénsia balu nu’udar jornalista iha ajénsia notísia ida.

Semináriu ne’e, konta ho prezensa jornalista sira hosi órgaun komunikasaun sosiál oioin, ne’ebé partisipa ativa tebetebes iha debate iha sesaun ida-idak nia rohan no ninia objetivu atu kontribui ba hanoin ida ne’ebé momoos liu kona-ba importánsia kriasaun ajénsia notísia ida iha Timor-Leste.