Governu Timor-Leste

Primeiru-Ministru Repúblika Demokrátika Timor-Leste, Xanana Gusmão, no Primeiru-Ministru Repúblika Portuguesa, Pedro Passos Coelho, hamutuk ho Ministru Edukasaun Timor-Leste, Bendito Freitas, Reitór Universidade Nasionál Timor Leste (UNTL), Aurélio Guterres no Prezidente Camões-Instituto da Cooperação e Língua, Ana Paula Laborinho, inaugura Feira Livru CPLP nian iha loron 22 fulan-Jullu, iha Sentru Konvensaun Díli.

Kay Rala Xanana Gusmão hahú hodi hatete katak “Timor-Leste hanesan nasaun ne’ebé ho difikuldade barak iha lian portugés” hodi fó hanoin hikas katak “durante tinan 24 lian portugés bandu atu labele uza”.

Primeiru-Ministru hanoin hikas kompromisu Governu Timor-Leste nian kona-ba problema lian portugés, tanba ne’e maka dadaun ne’e Ministériu Edukasaun, no mós UNTL haka’as an hela iha formasaun ba profesór sira, no nia hatutan-tan mós katak, Timor-Leste sei sai uma-na’in ba-iha tinan 2016, ba Konferénsia Internasionál da-III kona-ba Futuru Lian Portugés nian iha Sistema Mundiál.

Xefe Governu na’in rua ne’e mós entrega simbolikamente livru ba instituisaun Timor nian hamutuk hitu, no Xanana Gusmão mós halo lansamentu ba livru “Timor-Leste 365 passos para o coração” ne’ebé hakerek hosi Cristina Macrino no Sara Montes.

Mai mós iha inaugurasaun Feira Livru CPLP nian ne’e, Sekretáriu Estadu Negósiu Estranjeiru no Kooperasaun Portugal nian, Luís Campos Ferreira no Vise-Ministru Relasaun Esteriór Brazil nian, Paulo Cordeiro de Andrade Pinto.

Primeiru-Minsirtu Timor-Leste aproveita okaziaun ne’e hodi fó omenájen boot ida ba Padre Felgueiras no ba Padre Martins, ne’ebé mak mai asiste mós serimónia ne’e, ba tulun ne’ebé maka sira fó tiha ona iha tinan barak nia laran, ba Timor-Leste.

Feira Livru CPLP nian sei loke ba públika husi loron 23 to’o 26 fulan-Jullu, husi oras tuku 09:00 to’o 19:00, no iha loron 23 no 24 livru sira sei faan de’it ba sidadaun timoroan sira.