“Ponte ida entre Timor-Leste no nia maun-alin sira”
Prezidente Repúblika Demokrátika Timor-Leste nian, Taur Matan Ruak, iha loron 22 fulan-Jullu, iha Dili, hala’o inaugurasaun ba ponte ne’ebé nia hanaran Ponte CPLP.
Ponte CPLP “ne’e símbolu ida, ne’ebé hili ho laran-ksolok hodi fó rekoñesimentu solidariedade ba povu belun no maun-alin Timor-Leste nian ne’ebé apoia ami durante luta libertasaun nian. CPLP ne’e identidade ida no ida-ne’e ponte entre Timor-Leste no nia povu maun-alin sira hosi tasi-sorin”, tenik Prezidente Repúblika.
Taur Matan Ruak hato’o agradesimentu ba Governu tanba harii ponte ida ho nia naruk metru 180 no harii iha faze rua, hodi bele hakat-liu mota Comoro nia ninin rua, ne’ebé suli liuhosi kapitál Timor-Leste nian.
Bainhira Primeiru-Ministru Repúblika Demokrátika Timor-Leste, Xanana Gusmão to’o iha fatin inaugurasaun nian, povu sira-ne’ebé halibur tiha ona iha ne’ebá hodi asiste eventu ne’e, simu nia ho laran-haksolok.
Iha loron Konferénsia ba da-X Xefe Estadu no Governu CPLP nian, mai asisti mós eventu ida ne’e, reprezentante entidade nível aas nian sira hosi nasaun Komunidade ne’e nian, ne’ebé iha ona territóriu laran atu partisipa iha Simeira: Prezidente Repúblika Cabo Verde, Carlos Fonseca; Prezidente Repúblika Moçambique, Armando Guebuza; Prezidente Repúblika Demokrátika São Tomé e Príncipe, Manuel Pinto da Costa; Vise-Prezidente Repúblika Angola, Manuel Domingos Vicente; Primeiru-Ministru Guiné-Bissau, Domingos Simões Pereira; Primeiru-Ministru Portugal, Pedro Passos Coelho; Vise-Ministru Relasaun Esteriór Brasil nian, Paulo Cordeiro de Andrade Pinto.
Mai mós iha Simeira ne’e, Sekretáriu Ezekutivu CPLP, Murade Murargy; Prezidente Asembleia Nasionál Angola no Asembleia Parlamentár CPLP, Fernando Piedade dos Santos; membru Governu Konstitusionál-V Timor-Leste nian no na’i ulun Timor-Leste nian sira-seluk hanesan Prezidente Parlamentu Nasionál, Vicente Guterres; ex-Primeiru-Ministru, Mari Alkatiri; Prezidente Komisaun Preparasaun Simeira, Francisco Guterres Lu-Olo, no Bispu Dioseze Dili, Dom Alberto Ricardo, ne’ebé, iha oras-dahikus serimónia nian, fó bensaun ba Ponte CPLP.
