Sorumutuk XIX Konsellu Ministru CPLP nian
Sorumutuk XIX Konsellu Ministru CPLP nian hala’o iha tersa ne’e, loron 22 fulan Jullu, iha Ministériu Negósiu Estranjeiru no Kooperasaun, iha Dili, hodi halo hotu ona knaar preparasaun nian ba Konferénsia Xefe Estadu no Xefe Governu nian sira ne’ebé sei hala’o iha kuarta, loron 23 fulan Jullu.
Iha sorumutuk ne’ebé la loke públiku ne’e, aprezenta relatóriu barak, maka hanesan: Relatóriu husi Prezidente Sesante Konsellu Ministru CPLP nian, Oldemiro Baloi; Relatóriu husi Sekretáriu Ezekutivu, Murade Murargy; Relatóriu husi Reprezentanre Espesiál CPLP nian iha Guiné-Bissau, Carlos Moura; no Relatóriu husi Diretór Institutu Internasionál Lian Portugés, Profesór Gilvan Muller de Oliveira. Aleinde ne’e apresia no rekomenda mós Projetu Rezolusaun nian no mós Projetu Deklarasaun nian ba Konferénsia ne’e.
Iha sotumutuk ida ne’e, ne’ebé hala’o iha loron ne’e tomak, Moçambique pasa Prezidénsia rotativa ba Timor-Leste, ne’ebé asume kargu ne’e durante tinan rua oinmai.
Iha sorumutk ne’e nia rohan, Ministru Estadu no negósiu Estranjeiru no Kooperasaun, José Luís Guterres, iha ona kualidade nu’udar Prezidente Konsellu Ministru CPLP nian, ko’alia ba komunikasaun sosiál, hodi halo rezumu kona-ba knaar hirak ne’ebé hala’o ona iha loron ne’e tomak. Marka mós prezensa iha Komunikasaun ba Media ne’e, maka Diretór-Jerál CPLP nian, Georgina Benrós de Mello, ne’ebé felisita “Governu Timor-leste nian no mákina tomak ne’ebé monta ona atu hala’o Simeira ne’e”. Diretora-Jerál Komunidade ne’e nian dehan sai mós “forma suave” oinsá maka tranzisaun Prezidénsia rotativa nian ne’e hala’o, hodi konklui katak fasilidade ne’ebé uza hela hodi hala’o knaar sira hatudu maturidade CPLP nian.
